Neft-gaz tarmaǵında xalıqaralıq birge islesiwdi keńeytiw, óndiris processlerin modernizaciyalaw hám aldınǵı texnologiyalıq sheshimlerdi engiziwge qaratılǵan jumıslar izbe-iz dawam etpekte. Bul processte “Ózbekneftgaz” AJ hám “SOCAR” kompaniyası arasındaǵı óz-ara sóylesiw hám ámeliy birge islesiw ayrıqsha áhmiyetke iye.
Usı jumıslar sheńberinde jámiyet basshılıǵı “SOCAR” kompaniyasınıń tarmaqlıq strukturaları – “SOCAR Trading” hám “SOCAR Downstream Management” wákilleri menen ushırasıw ótkerdi.
Sóylesiw dawamında eki mámleket arasındaǵı strategiyalıq sherikliktiń bekkemlenip atırǵanı, onıń joqarı dárejede qollap-quwatlanıp atırǵanı ayrıqsha atap ótildi. Atap aytqanda, eki mámleket basshıları Shavkat Mirziyoev hám Ilham Alievtiń basshılıǵındaǵı siyasiy sóylesiw ekonomikalıq baylanıslar, sonıń ishinde, neft-gaz tarawındaǵı birge islesiwdi jáne de jedellestiriwge xızmet etip atırǵanı atap ótildi.
Ushırasıw waqtında “SOCAR” wákilleri “Ózbekneftgaz” AJ menen birgelikte Buxara neftti qayta islew zavodınıń jumıs nátiyjeliligin arttırıw, óndiristi optimallastırıw hám zamanagóy operaciyalıq texnologiyalardı engiziw baǵdarlarında birge islesiwdi keńeytiwge tayar ekenligin bildirdi. Sonday-aq, sanlı basqarıw sheshimlerin engiziw, texnologiyalıq processlerdi jetilistiriw hám energiya nátiyjeliligin arttırıwǵa qaratılǵan bir qatar usınıslar dodalandı.
Jámiyet málimleme xızmetiniń xabarına bola, ushırasıw sońında tárepler ámeliy birge islesiwdi izbe-iz dawam ettiriw, birgeliktegi baslamalardı basqıshpa-basqısh ámelge asırıw hám perspektivalı joybarlardı birgelikte islep shıǵıw boyınsha kelisimge eristi. Sonıń menen birge, texnikalıq audit ótkeriw hám onıń nátiyjeleri boyınsha keyingi qádemlerdi belgilew maqsetinde Ázerbayjan tárepi jumısshı toparınıń kárxanaǵa saparın shólkemlestiriwge kelisip alındı.

N.Ziyodullaeva, ÓzA