ӨзЛиДеП Тахтакөпир районлық Кеңеси тәрепинен ҳәр жылы дәстүрий өткерилип киятырған “Мәҳәллениң исбилермен ҳаялы” таңлаўының райондағы мәҳәлле басқышы шөлкемлестирилди.

Таңлаў райондағы «Өзбекстан», «Ғәрезсизлик», «Айдын жол», «Дәўир» МПЖ ҳәм А.Адилов атындағы АПЖ да  мәҳәлле басқышы  шөлкемлескенлик пенен өткерилди. Таңлаўда исбилермен ҳәм өнермент ҳаял-қызлар өз тәжрийбелери ҳәм қол мийнети үлгилери менен қатнасты.

Төрешилер қурамы ағзалары жеңимпазлыққа талабанлардың әмелий жумыслары менен жақыннан танысып, усы күнге шекем ерискен жетискенликлери, имканиятлары ҳәм келешектеги режелери үйренилди.

Таңлаў жуўмағы бойынша «Өзбекстан» мәҳәллесинен фермер Жазира Даниярова, «Ғәрезсизлик» мәҳәллесинен миллий кийимлер тигиўшиси Ләззет Баймурзаева, «Айдын жол» мәҳәллесинен ағаш өнимлеринен миллий асбап-үскенелер ислеп шығарыўшы Жанат Қолқанатова, «Дәўир» мәҳәллесинен Ҳүрлиман Өтениязова ҳәм А.Адилов аўыл пуқаралар жыйынынан өнермент Нәзигүл Алламуратова мәҳәллелер басқышында жеңимпаз болып, районлық басқышқа жоллама алды.

                                                                 Қарақалпақстан хабар агентлиги