Дүньядағы жедел өзгерислер шараятында түрли мәмлекетлер ҳәм регионларда жүз берип атырған процесслерди қалыс және өз ўақтында сәўлелендириў айрықша әҳмийетке ийе. ҒХҚ тек ғана жаңалықлар дереги емес, ал мәмлекетлердеги реформалар, социаллық-экономикалық өзгерислер ҳәм алып барылып атырған сыртқы сиясатты сәўлелендирип, халықаралық жәмийетшилик пикирин қәлиплестириўши әҳмийетли қурал болып есапланады.

Сонлықтан, ӨзАның сырт елли бирге ислесиўшилериниң бетлеринде жәрияланып атырған Жаңа Өзбекстандағы өзгерислер, пикирлер ҳәм бақлаўлар өз көринисин тапқан мақалалар айрықша қызығыўшылық оятады. Бул материалларды таллаў халықаралық жәмийетшиликтиң елимизде алып барылып атырған реформалар, елимиздеги ашық-айдынлық сиясаты ҳәм мәмлекетимиздиң сыртқы дүнья менен бирге ислесиўди беккемлеў бағдарындағы ҳәрекетлерин қалай қабыл етип атырғанын үйрениў имканиятын береди.

Anadolu (Түркия)

Түркияның «Dorçe Prefabrik Yapı ve İnşaat» компаниясы 6 континенттеги 64 мәмлекетте жойбарларды әмелге асырды

Түркияның «Dorçe» компаниясы глобаллық жойбарларының көлемин кеңейтпекте. «Anadolu» мәлимлеме агентлигиниң хабар бериўинше, бул компания жыйналмалы полат конструкциялардан пайдаланып, дүньяның 64 мәмлекетинде қурылыс жойбарларын турмысқа енгизди. Компания директорлар кеңесиниң баслығы Сюҳейла Чеби Караханның айтыўынша, кәрхана 1989-жылы Анкара ўәлаятында полат профильлер ислеп шығарыў мақсетинде шөлкемлестирилген. 1994-жылға келип компания модуль конструкциялар ислеп шығарыўды жолға қойды ҳәм 1996-жылы дәслепки экспортын әйне Өзбекстанға әмелге асырды.

Бүгинги күнде «Dorçe» компаниясы жойбарластырыўдан монтажлаўға шекемги процессти қамтып алған EPC модели тийкарында ислеп, он жылдан берли «Engineering News-Record» (ENR) халықаралық басылымының рейтингинен орын ийелеп келмекте.

Синьхуа (Қытай)

Қытай ҳәм Өзбекстан шөллениўге қарсы гүресиўде бирге ислесиўди беккемлемекте

Қытай ҳәм Өзбекстан шөллениўдиң алдын алыў ҳәм тәбияттан ақылға уғрас пайдаланыў бойынша өз-ара бирге ислесиўди кеңейтпекте. Бул мәселелер “Қытай (Нинся) – Өзбекстан” видеоконференциясының тийкарғы темасына айланды. Конференцияда еки мәмлекет ўәкиллери әмелий тәжирийбе алмасып, биргеликтеги жойбарлардың перспективаларын додалады. Илаж еки мәмлекеттиң елшиханалары ҳәм тийисли уйымларының қатнасыўында шөлкемлестирилди. Онда мәмлекетлеримиз қурғақшылық, суў ресурсларының жетиспеўшилиги ҳәм топырақ деградациясы сыяқлы машқалаларға дус келип атырғаны атап өтилди.

Сөйлесиў ўақтында 2025-жылы Қытай ҳәм Орайлық Азия мәмлекетлериниң шөллениўге қарсы гүресиў бойынша бирге ислесиў орайы шөлкемлестирилгени еске алынды. Бул орайдың жумысы технологиялар, илимий изертлеўлер алмасыўы ҳәм қәнигелер таярлаўға хызмет етиўи күтилмекте. Әнжуманда Өзбекстанның Қытайдағы елшиси Фарҳод Арзиев қатнасты. Елши Қытай Миллий тәбият қорықханасында болып, экосистемаларды тиклеў ҳәм қумды турақластырыў бойынша Қытай усыллары менен танысты.

ТАСС (Россия)

Өзбекстанда “Росатом” менен биргеликте ядро медицинасын раўажландырыў бойынша биргеликтеги жойбар иске қосылды

Өзбекстанда “Росатом” мәмлекетлик корпорациясы менен биргеликте ядро медицинасын раўажландырыў бойынша жойбар иске қосылды. “Өзатом” агентлигиниң мағлыўматларына бола, тәреплер “жол картасы” ҳәм стратегияны таярлаўға келисип алды. Ҳүжжетте технологияларды жеткерип бериў, қәнигелер таярлаў, диагноз қойыў имканиятларын кеңейтиў ҳәм онкологиялық кеселликлерди емлеў нәзерде тутылған. Жойбар заманагөй инфраструктураны қәлиплестириўди өз ишине алады. Оның шеңберинде Ташкентте, сондай-ақ, жоқары технологиялы үскенелер менен тәмийинленген Ядро медицинасы орайының иске қосылыўы режелестирилмекте.

Kazinform (Қазақстан)

Өзбекстанда туўылыў дәрежеси 2020-жылдан берли биринши мәрте 900 мыңнан азайды

“Kazinform” мәлимлеме агентлигиниң хабар бериўинше, Өзбекстанда халықтың өсиўи төменлегени атап өтилмекте. 2025-жылы мәмлекетте туўылыўлар саны 2020-жылдан берли биринши мәрте 900 мыңнан төмен болған. 2026-жыл 1-январь жағдайына бола, республиканың турақлы халқының саны бир жылда 1,8 процентке өсип, 38,2 миллион адамды қураған. Сырт елден мәмлекетке 1 159 адам көшип келген болса, 10 117 адам шетке шығып кеткени атап өтилген. Өткен жыл даўамында 267,1 мың неке ҳәм 46,9 мың ажырасыў дизимге алынған.

Азиза АЛИМОВА таярлады, ӨзА