Dúnyadaǵı jedel ózgerisler sharayatında túrli mámleketler hám regionlarda júz berip atırǵan processlerdi qalıs jáne óz waqtında sáwlelendiriw ayrıqsha áhmiyetke iye. ǴXQ tek ǵana jańalıqlar deregi emes, al mámleketlerdegi reformalar, sociallıq-ekonomikalıq ózgerisler hám alıp barılıp atırǵan sırtqı siyasattı sáwlelendirip, xalıqaralıq jámiyetshilik pikirin qáliplestiriwshi áhmiyetli qural bolıp esaplanadı.
Sonlıqtan, ÓzAnıń sırt elli birge islesiwshileriniń betlerinde járiyalanıp atırǵan Jańa Ózbekstandaǵı ózgerisler, pikirler hám baqlawlar óz kórinisin tapqan maqalalar ayrıqsha qızıǵıwshılıq oyatadı. Bul materiallardı tallaw xalıqaralıq jámiyetshiliktiń elimizde alıp barılıp atırǵan reformalar, elimizdegi ashıq-aydınlıq siyasatı hám mámleketimizdiń sırtqı dúnya menen birge islesiwdi bekkemlew baǵdarındaǵı háreketlerin qalay qabıl etip atırǵanın úyreniw imkaniyatın beredi.
Anadolu (Túrkiya)
Túrkiyanıń «Dorçe Prefabrik Yapı ve İnşaat» kompaniyası 6 kontinenttegi 64 mámlekette joybarlardı ámelge asırdı
Túrkiyanıń «Dorçe» kompaniyası globallıq joybarlarınıń kólemin keńeytpekte. «Anadolu» málimleme agentliginiń xabar beriwinshe, bul kompaniya jıynalmalı polat konstrukciyalardan paydalanıp, dúnyanıń 64 mámleketinde qurılıs joybarların turmısqa engizdi. Kompaniya direktorlar keńesiniń baslıǵı Syuheyla CHebi Karaxannıń aytıwınsha, kárxana 1989-jılı Ankara wálayatında polat profiller islep shıǵarıw maqsetinde shólkemlestirilgen. 1994-jılǵa kelip kompaniya modul konstrukciyalar islep shıǵarıwdı jolǵa qoydı hám 1996-jılı dáslepki eksportın áyne Ózbekstanǵa ámelge asırdı.
Búgingi kúnde «Dorçe» kompaniyası joybarlastırıwdan montajlawǵa shekemgi processti qamtıp alǵan EPC modeli tiykarında islep, on jıldan berli «Engineering News-Record» (ENR) xalıqaralıq basılımınıń reytinginen orın iyelep kelmekte.
Sinxua (Qıtay)
Qıtay hám Ózbekstan shólleniwge qarsı gúresiwde birge islesiwdi bekkemlemekte
Qıtay hám Ózbekstan shólleniwdiń aldın alıw hám tábiyattan aqılǵa uǵras paydalanıw boyınsha óz-ara birge islesiwdi keńeytpekte. Bul máseleler “Qıtay (Ninsya) – Ózbekstan” videokonferenciyasınıń tiykarǵı temasına aylandı. Konferenciyada eki mámleket wákilleri ámeliy tájiriybe almasıp, birgeliktegi joybarlardıń perspektivaların dodaladı. Ilaj eki mámlekettiń elshixanaları hám tiyisli uyımlarınıń qatnasıwında shólkemlestirildi. Onda mámleketlerimiz qurǵaqshılıq, suw resurslarınıń jetispewshiligi hám topıraq degradaciyası sıyaqlı mashqalalarǵa dus kelip atırǵanı atap ótildi.
Sóylesiw waqtında 2025-jılı Qıtay hám Oraylıq Aziya mámleketleriniń shólleniwge qarsı gúresiw boyınsha birge islesiw orayı shólkemlestirilgeni eske alındı. Bul oraydıń jumısı texnologiyalar, ilimiy izertlewler almasıwı hám qánigeler tayarlawǵa xızmet etiwi kútilmekte. Ánjumanda Ózbekstannıń Qıtaydaǵı elshisi Farhod Arziev qatnastı. Elshi Qıtay Milliy tábiyat qorıqxanasında bolıp, ekosistemalardı tiklew hám qumdı turaqlastırıw boyınsha Qıtay usılları menen tanıstı.
TASS (Rossiya)
Ózbekstanda “Rosatom” menen birgelikte yadro medicinasın rawajlandırıw boyınsha birgeliktegi joybar iske qosıldı
Ózbekstanda “Rosatom” mámleketlik korporaciyası menen birgelikte yadro medicinasın rawajlandırıw boyınsha joybar iske qosıldı. “Ózatom” agentliginiń maǵlıwmatlarına bola, tárepler “jol kartası” hám strategiyanı tayarlawǵa kelisip aldı. Hújjette texnologiyalardı jetkerip beriw, qánigeler tayarlaw, diagnoz qoyıw imkaniyatların keńeytiw hám onkologiyalıq keselliklerdi emlew názerde tutılǵan. Joybar zamanagóy infrastrukturanı qáliplestiriwdi óz ishine aladı. Onıń sheńberinde Tashkentte, sonday-aq, joqarı texnologiyalı úskeneler menen támiyinlengen Yadro medicinası orayınıń iske qosılıwı rejelestirilmekte.
Kazinform (Qazaqstan)
Ózbekstanda tuwılıw dárejesi 2020-jıldan berli birinshi márte 900 mıńnan azaydı
“Kazinform” málimleme agentliginiń xabar beriwinshe, Ózbekstanda xalıqtıń ósiwi tómenlegeni atap ótilmekte. 2025-jılı mámlekette tuwılıwlar sanı 2020-jıldan berli birinshi márte 900 mıńnan tómen bolǵan. 2026-jıl 1-yanvar jaǵdayına bola, respublikanıń turaqlı xalqınıń sanı bir jılda 1,8 procentke ósip, 38,2 million adamdı quraǵan. Sırt elden mámleketke 1 159 adam kóship kelgen bolsa, 10 117 adam shetke shıǵıp ketkeni atap ótilgen. Ótken jıl dawamında 267,1 mıń neke hám 46,9 mıń ajırasıw dizimge alınǵan.

Aziza ALIMOVA tayarladı, ÓzA