Британияда бас министр Кир Стармер отставкасына шақырықлар күшейди. Түркия парламентинде жаңа әдиллик министри тайынланыўы артынан төбелес жүз берди. Испания ҳәм Португалияда күшли боранлар себепли мыңлаған халық эвакуация етилди. Қазақстанда бала ишегинен 31 магнит шығарып алынды. Кубада жанылғы жетиспеўшилиги себепли пәрўазлар тоқтатылды. Қытай жасалма интеллекти мәлимлеме тәсиринде гүманланбақта. Сондай-ақ, Вьетнам жетекшисиниң АҚШқа итималлы сапары ҳаққында да сөз етемиз.

Британияда Стармер отставкасына шақырықлар күшейди

Британияда өткерилген сораў нәтийжелерине бола, халықтың ярымынан көби бас министр Кир Стармердиң отставкасын талап етпекте, оған америкалы миллиардер Жеффри Эпштейн менен байланыслы машқала орайында турған Питер Манделсонның АҚШқа елши етип тайынланғаны себеп болған. Стармер қәтени мойынлаған болса да, лаўазымынан кетпейтуғынын билдирген, бирақ оның жақын мәсләҳәтшилери отставкаға шыққан.

Түркия парламентинде төбелес жүз берди

Түркия парламентинде жаңа әдиллик министри Акин Гурлектиң ант бериў мәресими ўақтында ҳүкимдар партия ҳәм оппозиция депутатлары арасында кескин жәнжел келип шығып, ол төбелеске шекем барған. Жәнжелге Гурлектиң алдын Истанбул мэри Акром Имомўғлини қамаққа алыў қарарында қатнасқаны себеп болғаны айтылмақта.

Қазақстанда бала ишегинен 31 магнит шығарылды

Алматыда бир жастан асқан бала 31 магнитти жутып жибергеннен кейин қыстаўлы операция исленди. Шыпакерлер магнитлер ишек дийўалларын тесип, аўыр исиниўге себеп болғанын мәлим етип, өз ўақтында хирургиялық жәрдем көрсетилмесе жағдай өлим менен жуўмақланыўы мүмкин екенлигин атап өтти.

Кубада жанылғы жетиспеўшилиги себепли пәрўазлар тоқтады

Кубада нефть жеткерип бериў үзилиси артынан жанылғы жетиспеўшилиги күшейип, Россияның бир неше авиакомпаниялары атаўға пәрўазларды ўақтынша бийкарлады. Нәтийжеде мыңлаған россиялы туристлер мәмлекетте қалып кеткен, ҳүкимет болса транспорт ҳәм мәмлекетлик мәкемелердиң жумысын шеклеген.

Қытай жасалма интеллекти информация тәсиринде гүманланбақта

Эстония разведкасы Қытайда жаратылған “ДеэпСеэк” жасалма интеллект модели сиясий темаларда бир тәреплеме мәлимлеме тарқатып, Батыс жәмийетшилигине тәсир өткериўге урынып атырғанын мәлим етти. Есабатта система әсиресе қәўипсизликке байланыслы мәселелерде Қытай рәсмий позициясын жасырын түрде үгит-нәсиятлап атырғаны атап өтилген.

Испания ҳәм Португалияда күшли боранлар қәўпи

Испания ҳәм Португалияда күшли самал ҳәм жаўынлар ақыбетинде транспорт изден шықты, мектеплер жабылды ҳәм мыңлаған халық қәўипсиз аймақларға көширилди. Айырым аймақларда толқынлардың бийиклиги 9 метрге жетиўи мүмкинлиги ҳаққында ескертиў берилди.

Вьетнам жетекшиси АҚШқа барыўы мүмкин

Вьетнам Коммунистлик партиясы басшысы То Лам келеси ҳәпте Вашингтонда өткерилетуғын Тынышлық кеңесиниң мәжилисине қатнасыўы күтилмекте. Reuters дереклерине бола, сапар етиў шеңберинде авиация ҳәм саўда мәселелери додаланыўы мүмкин.

Қарақалпақстан хабар агентилиги