Britaniyada bas ministr Kir Starmer otstavkasına shaqırıqlar kúsheydi. Túrkiya parlamentinde jańa ádillik ministri tayınlanıwı artınan tóbeles júz berdi. Ispaniya hám Portugaliyada kúshli boranlar sebepli mıńlaǵan xalıq evakuaciya etildi. Qazaqstanda bala isheginen 31 magnit shıǵarıp alındı. Kubada janılǵı jetispewshiligi sebepli párwazlar toqtatıldı. Qıtay jasalma intellekti málimleme tásirinde gúmanlanbaqta. Sonday-aq, Vetnam jetekshisiniń AQShqa itimallı saparı haqqında da sóz etemiz.
Britaniyada Starmer otstavkasına shaqırıqlar kúsheydi
Britaniyada ótkerilgen soraw nátiyjelerine bola, xalıqtıń yarımınan kóbi bas ministr Kir Starmerdiń otstavkasın talap etpekte, oǵan amerikalı milliarder Jeffri Epshteyn menen baylanıslı mashqala orayında turǵan Piter Mandelsonnıń AQShqa elshi etip tayınlanǵanı sebep bolǵan. Starmer qáteni moyınlaǵan bolsa da, lawazımınan ketpeytuǵının bildirgen, biraq onıń jaqın másláhátshileri otstavkaǵa shıqqan.
Túrkiya parlamentinde tóbeles júz berdi
Túrkiya parlamentinde jańa ádillik ministri Akin Gurlektiń ant beriw máresimi waqtında húkimdar partiya hám oppoziciya deputatları arasında keskin jánjel kelip shıǵıp, ol tóbeleske shekem barǵan. Jánjelge Gurlektiń aldın Istanbul meri Akrom Imomwǵlini qamaqqa alıw qararında qatnasqanı sebep bolǵanı aytılmaqta.
Qazaqstanda bala isheginen 31 magnit shıǵarıldı
Almatıda bir jastan asqan bala 31 magnitti jutıp jibergennen keyin qıstawlı operaciya islendi. Shıpakerler magnitler ishek diywalların tesip, awır isiniwge sebep bolǵanın málim etip, óz waqtında xirurgiyalıq járdem kórsetilmese jaǵday ólim menen juwmaqlanıwı múmkin ekenligin atap ótti.
Kubada janılǵı jetispewshiligi sebepli párwazlar toqtadı
Kubada neft jetkerip beriw úzilisi artınan janılǵı jetispewshiligi kúsheyip, Rossiyanıń bir neshe aviakompaniyaları atawǵa párwazlardı waqtınsha biykarladı. Nátiyjede mıńlaǵan rossiyalı turistler mámlekette qalıp ketken, húkimet bolsa transport hám mámleketlik mákemelerdiń jumısın sheklegen.
Qıtay jasalma intellekti informaciya tásirinde gúmanlanbaqta
Estoniya razvedkası Qıtayda jaratılǵan “DeepSeek” jasalma intellekt modeli siyasiy temalarda bir tárepleme málimleme tarqatıp, Batıs jámiyetshiligine tásir ótkeriwge urınıp atırǵanın málim etti. Esabatta sistema ásirese qáwipsizlikke baylanıslı máselelerde Qıtay rásmiy poziciyasın jasırın túrde úgit-násiyatlap atırǵanı atap ótilgen.
Ispaniya hám Portugaliyada kúshli boranlar qáwpi
Ispaniya hám Portugaliyada kúshli samal hám jawınlar aqıbetinde transport izden shıqtı, mektepler jabıldı hám mıńlaǵan xalıq qáwipsiz aymaqlarǵa kóshirildi. Ayırım aymaqlarda tolqınlardıń biyikligi 9 metrge jetiwi múmkinligi haqqında eskertiw berildi.
Vetnam jetekshisi AQShqa barıwı múmkin
Vetnam Kommunistlik partiyası basshısı To Lam kelesi hápte Vashingtonda ótkeriletuǵın Tınıshlıq keńesiniń májilisine qatnasıwı kútilmekte. Reuters dereklerine bola, sapar etiw sheńberinde aviaciya hám sawda máseleleri dodalanıwı múmkin.

Qaraqalpaqstan xabar agentiligi