Орайлық Азияда энергетика тараўындағы өз-ара бирге ислесиўди раўажландырыў, электр энерия алмасыўын кеңейтиў ҳәм бирден бир энергетика системасы шеңбериндеги бирге ислесиўди тереңлестириў бүгинги күнде регион мәмлекетлери арасындағы әҳмийетли тийкарғы бағдарлардан бирине айланбақта.

Ташкент қаласында Өзбекстан ҳәм Тәжикстан мәмлекетлер энергетика министрлери Жўрабек Мирзамаҳмудов ҳәм Далер Жума арасында өткерилген гезектеги ушырасыўда да еки тәреплеме бирге ислесиў додаланды.

Сөйлесиўлер ўақтында еки мәмлекет басшылары Шавкат Мирзиёев ҳәм Эмомали Раҳмонның басламалары менен соңғы жылларда Өзбекстан ҳәм Тәжикстан арасындағы бирге ислесиў барлық тараўлар қатарында энергетика бағдарында да избе-из раўажланып атырғаны атап өтилди. Тәреплер әмелге асырылып атырған биргеликтеги жойбарлардың нәтийжелилиги ҳәм олардың регионаллық турақлылыққа қосып атырған үлесин атап өтти.

Ушырасыў даўамында энергетика системаларының жумысын муўапықластырыў, электр тармақларын модернизациялаў, электр энергиясы алмасыў көлемин басқышпа-басқыш арттырыў сыяқлы мәселелерге итибар қаратылды. Сондай-ақ, “Орайлық Азияның бирден-бир энергетика системасына қайта жалғаныў” жойбары шеңбериндеги техникалық ҳәм шөлкемлестириў мәселелери бойынша пикир алысылды.

Министрлик мәлимлеме хызметиниң хабарына бола, сөйлесиўлердиң жуўмағында тәреплер өз-ара туўысқанлық ҳәм стратегиялық шериклик қатнасықларын және де беккемлеў, энергетика тараўындағы бирге ислесиўди кеңейтиў ҳәм еки мәмлекет халықларының мәплерине хызмет ететуғын биргеликтеги басламаларды избе-из даўам еттириўге таяр екенлигин билдирди.

Н.Зиёдуллаева, ӨзА