Oraylıq Aziyada energetika tarawındaǵı óz-ara birge islesiwdi rawajlandırıw, elektr eneriya almasıwın keńeytiw hám birden bir energetika sisteması sheńberindegi birge islesiwdi tereńlestiriw búgingi kúnde region mámleketleri arasındaǵı áhmiyetli tiykarǵı baǵdarlardan birine aylanbaqta.
Tashkent qalasında Ózbekstan hám Tájikstan mámleketler energetika ministrleri Jwrabek Mirzamahmudov hám Daler Juma arasında ótkerilgen gezektegi ushırasıwda da eki tárepleme birge islesiw dodalandı.
Sóylesiwler waqtında eki mámleket basshıları Shavkat Mirziyoev hám Emomali Rahmonnıń baslamaları menen sońǵı jıllarda Ózbekstan hám Tájikstan arasındaǵı birge islesiw barlıq tarawlar qatarında energetika baǵdarında da izbe-iz rawajlanıp atırǵanı atap ótildi. Tárepler ámelge asırılıp atırǵan birgeliktegi joybarlardıń nátiyjeliligi hám olardıń regionallıq turaqlılıqqa qosıp atırǵan úlesin atap ótti.
Ushırasıw dawamında energetika sistemalarınıń jumısın muwapıqlastırıw, elektr tarmaqların modernizaciyalaw, elektr energiyası almasıw kólemin basqıshpa-basqısh arttırıw sıyaqlı máselelerge itibar qaratıldı. Sonday-aq, “Oraylıq Aziyanıń birden-bir energetika sistemasına qayta jalǵanıw” joybarı sheńberindegi texnikalıq hám shólkemlestiriw máseleleri boyınsha pikir alısıldı.
Ministrlik málimleme xızmetiniń xabarına bola, sóylesiwlerdiń juwmaǵında tárepler óz-ara tuwısqanlıq hám strategiyalıq sheriklik qatnasıqların jáne de bekkemlew, energetika tarawındaǵı birge islesiwdi keńeytiw hám eki mámleket xalıqlarınıń máplerine xızmet etetuǵın birgeliktegi baslamalardı izbe-iz dawam ettiriwge tayar ekenligin bildirdi.

N.Ziyodullaeva, ÓzA