Соңғы жыллары аўыл хожалығын заманагөй илимий көзқараслар тийкарында раўажландырыў, жаңа жерлерди нәтийжели өзлестириў ҳәм аграр тараўда турақлы өсиўди тәмийинлеў мәмлекетлик сиясатта тийкарғы бағдарға айланбақта.

Өзбекстан Республикасы Президенти Шавкат Мирзиёев аўыл хожалығында жаңа жерлерди өзлестириў ҳәм тараўда илимди жаңа басқышқа алып шығыўға қаратылған усыныслардың презентациясы менен танысқан еди.

Презентация ўақтында мәмлекетимиз басшысы тәрепинен бул бағдарларда үлкен нәтийжелерге ерисиў ушын әмелдеги институционаллық инфраструктураны жетилистириў, сондай-ақ, шөлкемлестирилетуғын Аўыл хожалығы илимлери академиясының жумысын нәтийжели жолға қойыў бойынша бир қатар әҳмийетли тапсырмалар берилди.

Аўыл хожалығы министрлигинде шөлкемлестирилген сөйлесиўде де аграр тараўда билимлендириў, илимий-изертлеў ҳәм өндиристи өз-ара үзликсиз байланыстыратуғын бирден-бир системаны қәлиплестириў мәселелери додаланды.

Атап өтилиўинше, усы жылы 25,5 мың гектар мийўе бағлары ҳәм 5 мың гектар жүзимзарлар жаратылады ҳәм сол арқалы 48 мың турақлы және мәўсимлик жумыс орынлары жаратылады.

Сондай-ақ, тараўда инновациялық ҳәм нәтийжели шешимлер енгизиледи, инвестиция ҳәм сырт ел грантларын жедел тартыў бойынша жаңа жойбарлар әмелиятқа енгизиледи.

Мәжилис жуўмағында бәҳәрги егис мәўсимине таярлық көриў, туқымларды өз ўақтында егиўге таярлаў, сондай-ақ, аймақларда азық-аўқат қәўипсизлигин тәмийинлеў бойынша алып барылып атырған жумыслар талланып, нәтийжелиликти арттырыўға қаратылған анық ўазыйпалар белгилеп алынды.

Муҳайё Тошқораева, ӨзА