Мектепке шекемги ҳәм мектеп билимлендириўи министрлиги системасындағы Әл-Беруний атындағы халықаралық мектеп-интернаты бүгинги күнде Өзбекстанда International Baccalaureate (IB)  бағдарламасы енгизилген абырайлы халықаралық билимлендириў мәкемелеринен бири болып есапланады. Бул мектеп заманагөй билим, халықаралық стандартлар ҳәм бәсекиге шыдамлы орталықты үйлестирген ҳалда жаслардың потенциалын толық ашып бериўге хызмет етеди.

Атап өтилиўинше, бул халықаралық мектеп-интернатқа ҳәр жылы жәми 60 оқыўшы қабыл етиледи. Соннан 40 оқыўшы анық пәнлер бағдарына, 20 оқыўшы болса тәбийғый пәнлер бағдарына ажыратылған квоталар тийкарында таңлап алынады. Бул болса ҳәр бир бағдар бойынша қәбилетли жасларды анықлаў ҳәм олардың қызығыўшылықларына сәйкес билим бериўге имканият жаратады.

Билимлендириў процесслери тийкарынан инглис тилинде алып барылады. Бул оқыўшыларға халықаралық көлемде тән алынатуғын билим ҳәм көнликпелерди ийелеў имканиятын береди. Соның менен бирге, өзбек тили ҳәм Өзбекстан тарийхы пәнлери мәмлекетлик тилде оқытылады.

Мектепте оқыў ушын улыўма билим бериў мектеплериниң 8-класс питкериўшилери онлайн тәризде арза тапсырыўы мүмкин. Қабыллаў имтиханлары еки басқышта шөлкемлестириледи ҳәм билим және логикалық пикирлеў дәрежеси тийкарғы норма сыпатында баҳаланады.

Әҳмийетли тәреплерден бири – қабыллаў процесинде оқыўшының алдынғы жыллардағы мектеп баҳалары есапқа алынбайды. Яғный, барлық талабанлар тең шараятта, тек имтихан нәтийжелери тийкарында таңлап алынады.

Жуўмақлап айтқанда, Әл-Беруний атындағы халықаралық мектеп-интернаты билимге қуштар, мақсетли ҳәм келешегин халықаралық көлемде көрген жаслар ушын үлкен имканиятлар есигин ашпақта.

Муҳайё Тошқораева,  ӨзА