Mektepke shekemgi hám mektep bilimlendiriwi ministrligi sistemasındaǵı Ál-Beruniy atındaǵı xalıqaralıq mektep-internatı búgingi kúnde Ózbekstanda International Baccalaureate (IB) baǵdarlaması engizilgen abıraylı xalıqaralıq bilimlendiriw mákemelerinen biri bolıp esaplanadı. Bul mektep zamanagóy bilim, xalıqaralıq standartlar hám básekige shıdamlı ortalıqtı úylestirgen halda jaslardıń potencialın tolıq ashıp beriwge xızmet etedi.
Atap ótiliwinshe, bul xalıqaralıq mektep-internatqa hár jılı jámi 60 oqıwshı qabıl etiledi. Sonnan 40 oqıwshı anıq pánler baǵdarına, 20 oqıwshı bolsa tábiyǵıy pánler baǵdarına ajıratılǵan kvotalar tiykarında tańlap alınadı. Bul bolsa hár bir baǵdar boyınsha qábiletli jaslardı anıqlaw hám olardıń qızıǵıwshılıqlarına sáykes bilim beriwge imkaniyat jaratadı.
Bilimlendiriw processleri tiykarınan inglis tilinde alıp barıladı. Bul oqıwshılarǵa xalıqaralıq kólemde tán alınatuǵın bilim hám kónlikpelerdi iyelew imkaniyatın beredi. Sonıń menen birge, ózbek tili hám Ózbekstan tariyxı pánleri mámleketlik tilde oqıtıladı.
Mektepte oqıw ushın ulıwma bilim beriw mektepleriniń 8-klass pitkeriwshileri onlayn tárizde arza tapsırıwı múmkin. Qabıllaw imtixanları eki basqıshta shólkemlestiriledi hám bilim jáne logikalıq pikirlew dárejesi tiykarǵı norma sıpatında bahalanadı.
Áhmiyetli táreplerden biri – qabıllaw procesinde oqıwshınıń aldınǵı jıllardaǵı mektep bahaları esapqa alınbaydı. Yaǵnıy, barlıq talabanlar teń sharayatta, tek imtixan nátiyjeleri tiykarında tańlap alınadı.
Juwmaqlap aytqanda, Ál-Beruniy atındaǵı xalıqaralıq mektep-internatı bilimge qushtar, maqsetli hám keleshegin xalıqaralıq kólemde kórgen jaslar ushın úlken imkaniyatlar esigin ashpaqta.

Muhayyo Toshqoraeva, ÓzA