2025-2026-оқыў жылы қабыллаў процесинен баслап айырым билимлендириў бағдарларына ҳүжжет тапсырыўда абитуриентлерден шет тилин билиў дәрежесин тастыйықлайтуғын миллий ямаса халықаралық сертификат талап етиледи.

Тийисли нызамшылыққа муўапық, пәнлер комплексинде шет тили биринши пән сыпатында белгиленген тәлим бағдарларына қабыллаў шет тили бойынша сертификат тийкарында әмелге асырылады.

Атап өтилиўинше, бундай бағдарларға қабыллаўда шет тили пәнинен тест сынағы өткерилмейди. Абитуриентлер белгиленген дәрежедеги сертификатты усыныўы шәрт болады.

2025-2026-оқыў жылы ушын республикалық жоқары билимлендириў мәкемелериниң билимлендириў бағдарлары ҳәм оларға сәйкес пәнлер комплексине бола, шет тили биринши пән сыпатында белгиленген бағдарлар дизими тийисли тәртипте қәлиплестирилген.

Итибарлы тәрепи сонда, егер 1-пән сыпатында анық тил (мәселен, инглис, немис ямаса француз тили) көрсетилген болса, абитуриент әйне усы тилден сертификатқа ийе болыўы керек. Мәселен, 1-пән “инглис тили” деп белгиленген бағдарға немис ямаса түрк тилинен сертификаты бар абитуриентлер ҳүжжет тапсыра алмайды.

Бирақ егер 1-пән сыпатында улыўма “шет тили” деп көрсетилген болса, онда абитуриент қайсы шет тилинен тастыйықланған сертификатқа ийе екени әҳмийетли емес. Бундай бағдарларға қәлеген шет тилинен алынған миллий ямаса халықаралық сертификат қабыл етиледи.

Қәнигелер абитуриентлерге ҳүжжет тапсырыўдан алдын таңланған бағдар бойынша пәнлер комплексин дыққат пенен үйрениў ҳәм талап етилетуғын сертификат түрин анықлаўды усыныс етпекте.

Муҳайё Тошқораева, ӨзА