2025/2026 ўқув йили қабул жараёнидан бошлаб айрим таълим йўналишларига ҳужжат топширишда абитуриентлардан хорижий тилни билиш даражасини тасдиқловчи миллий ёки халқаро сертификат талаб этилади.

Тегишли қонунчиликка мувофиқ, фанлар мажмуасида чет тили биринчи фан сифатида белгиланган таълим йўналишларига қабул қилиш хорижий тил бўйича сертификат асосида амалга оширилади.

Қайд этилишича, бундай йўналишларга қабул қилишда чет тили фанидан тест синови ўтказилмайди. Абитуриентлар белгиланган даражадаги сертификатни тақдим этишлари шарт бўлади.

2025/2026 ўқув йили учун республика олий таълим муассасалари таълим йўналишлари ҳамда уларга мос фанлар мажмуасига кўра, чет тили биринчи фан сифатида белгиланган йўналишлар рўйхати тегишли тартибда шакллантирилган.

Эътиборли жиҳати шундаки, агар 1-фан сифатида аниқ тил (масалан, инглиз, немис ёки француз тили) кўрсатилган бўлса, абитуриент айнан шу тилдан сертификатга эга бўлиши лозим. Масалан, 1-фан “инглиз тили” деб белгиланган йўналишга немис ёки турк тилидан сертификати бор абитуриентлар ҳужжат топшира олмайди.

Бироқ агар 1-фан сифатида умумий “чет тили” деб кўрсатилган бўлса, у ҳолда абитуриент қайси хорижий тилдан тасдиқланган сертификатга эга экани аҳамиятсиз. Бундай йўналишларга исталган хорижий тилдан олинган миллий ёки халқаро сертификат қабул қилинади.

Мутахассислар абитуриентларга ҳужжат топширишдан олдин танланган йўналиш бўйича фанлар мажмуасини диққат билан ўрганиш ва талаб этиладиган сертификат турини аниқлашни тавсия этмоқда.

Муҳайё Тошқораева, ЎзА