2025-2026-oqıw jılı qabıllaw procesinen baslap ayırım bilimlendiriw baǵdarlarına hújjet tapsırıwda abiturientlerden shet tilin biliw dárejesin tastıyıqlaytuǵın milliy yamasa xalıqaralıq sertifikat talap etiledi.
Tiyisli nızamshılıqqa muwapıq, pánler kompleksinde shet tili birinshi pán sıpatında belgilengen tálim baǵdarlarına qabıllaw shet tili boyınsha sertifikat tiykarında ámelge asırıladı.
Atap ótiliwinshe, bunday baǵdarlarǵa qabıllawda shet tili páninen test sınaǵı ótkerilmeydi. Abiturientler belgilengen dárejedegi sertifikattı usınıwı shárt boladı.
2025-2026-oqıw jılı ushın respublikalıq joqarı bilimlendiriw mákemeleriniń bilimlendiriw baǵdarları hám olarǵa sáykes pánler kompleksine bola, shet tili birinshi pán sıpatında belgilengen baǵdarlar dizimi tiyisli tártipte qáliplestirilgen.
Itibarlı tárepi sonda, eger 1-pán sıpatında anıq til (máselen, inglis, nemis yamasa francuz tili) kórsetilgen bolsa, abiturient áyne usı tilden sertifikatqa iye bolıwı kerek. Máselen, 1-pán “inglis tili” dep belgilengen baǵdarǵa nemis yamasa túrk tilinen sertifikatı bar abiturientler hújjet tapsıra almaydı.
Biraq eger 1-pán sıpatında ulıwma “shet tili” dep kórsetilgen bolsa, onda abiturient qaysı shet tilinen tastıyıqlanǵan sertifikatqa iye ekeni áhmiyetli emes. Bunday baǵdarlarǵa qálegen shet tilinen alınǵan milliy yamasa xalıqaralıq sertifikat qabıl etiledi.
Qánigeler abiturientlerge hújjet tapsırıwdan aldın tańlanǵan baǵdar boyınsha pánler kompleksin dıqqat penen úyreniw hám talap etiletuǵın sertifikat túrin anıqlawdı usınıs etpekte.

Muhayyo Toshqoraeva, ÓzA