Қоңырат районы ҳәкимлигинде “Исбилерменликти раўажландырыў компаниясы” АЖ қәнигелери, Саўда-санаат палатасының ўәкиллери, райондағы коммерциялық банклер ҳәм жергиликли исбилерменлердиң қатнасыўында гезектеги оқыў семинары шөлкемлестирилди.

Семинар даўамында компанияның исбилерменликти қоллап-қуўатлаўға қаратылған тийкарғы хызметлери, жеңилликлери ҳәм жаңа финанслық механизмлер ҳаққында мағлыўматлар берилди.

Атап айтқанда, киши, орта ҳәм ири исбилерменлер ушын кредит, лизинг, банк кепиллиги ҳәм аккредитивлер бойынша 10 миллиард сумға шекем кепиллик берилетуғыны мәлим етилди. Ал, хызметлер ипотекасы бойынша, 5-7 жылға шекем қайтарыў шәрти тийкарында 5 млрд. сумнан 20 млрд. сумға шекем, 84 айға шекемги мүддетте көшпес мүлк ямаса әсбап-үскенелер сатып алыў ушын ипотека механизмлери түсиндирилди. Сондай-ақ, киши исбилерменлерге 3 млрд., орта исбилерменлерге 5 млрд. сумға шекем компания тәрепинен үлес киргизиў имканиятлары берилетуғыны да атап өтилип, исбилерменлик жойбарларын қаржыландырыў мақсетинде коммерциялық банклер, микроқаржы шөлкемлери ҳәм лизинг компанияларына төмен процент ставкалары тийкарында ресурслар ажыратылатуғыны мәлим етилди.

Атап өтилгениндей, исбилерменлерге банк кредитлери бойынша процент ставкасының 5, 6 процентке шекемги бөлеги компания тәрепинен қаплап бериледи.

Сондай-ақ, семинарда Өзбекстан Республикасы Президентиниң бир қатар пәрман ҳәм қарарлары бойынша мағлыўматлар берилип, рәсмийлестириў, кредит алыў тәртиби, бизнес-реже дүзиў ҳәм компенсация алыў бойынша усыныслар берилди.

Қатнасыўшылар өзлерин қызықтырған сораўларға жуўап алды.

Қарақалпақстан хабар агентлиги