Qońırat rayonı hákimliginde “Isbilermenlikti rawajlandırıw kompaniyası” AJ qánigeleri, Sawda-sanaat palatasınıń wákilleri, rayondaǵı kommerciyalıq bankler hám jergilikli isbilermenlerdiń qatnasıwında gezektegi oqıw seminarı shólkemlestirildi.
Seminar dawamında kompaniyanıń isbilermenlikti qollap-quwatlawǵa qaratılǵan tiykarǵı xızmetleri, jeńillikleri hám jańa finanslıq mexanizmler haqqında maǵlıwmatlar berildi.
Atap aytqanda, kishi, orta hám iri isbilermenler ushın kredit, lizing, bank kepilligi hám akkreditivler boyınsha 10 milliard sumǵa shekem kepillik beriletuǵını málim etildi. Al, xızmetler ipotekası boyınsha, 5-7 jılǵa shekem qaytarıw shárti tiykarında 5 mlrd. sumnan 20 mlrd. sumǵa shekem, 84 ayǵa shekemgi múddette kóshpes múlk yamasa ásbap-úskeneler satıp alıw ushın ipoteka mexanizmleri túsindirildi. Sonday-aq, kishi isbilermenlerge 3 mlrd., orta isbilermenlerge 5 mlrd. sumǵa shekem kompaniya tárepinen úles kirgiziw imkaniyatları beriletuǵını da atap ótilip, isbilermenlik joybarların qarjılandırıw maqsetinde kommerciyalıq bankler, mikroqarjı shólkemleri hám lizing kompaniyalarına tómen procent stavkaları tiykarında resurslar ajıratılatuǵını málim etildi.
Atap ótilgenindey, isbilermenlerge bank kreditleri boyınsha procent stavkasınıń 5, 6 procentke shekemgi bólegi kompaniya tárepinen qaplap beriledi.
Sonday-aq, seminarda Ózbekstan Respublikası Prezidentiniń bir qatar párman hám qararları boyınsha maǵlıwmatlar berilip, rásmiylestiriw, kredit alıw tártibi, biznes-reje dúziw hám kompensaciya alıw boyınsha usınıslar berildi.
Qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi