Заманагөй технологияларды енгизиў тек ғана мәмлекеттиң нефть-газ тараўының нәтийжелилигин арттырыў емес, ал инвестиция ҳәм инновация имканиятларын кеңейтиўде үлкен әҳмийетке ийе.

Сол себепли, “Өзбекнефтьгаз” АЖ ҳәм халықаралық абырайлы компаниялар арасындағы стратегиялық ушырасыўлар турақлы шөлкемлестирилип, биргеликтеги жойбарларды әмелге асырыў ҳәм санлы шешимлерди енгизиў бағдарларында бирге ислесиўди беккемлеўге қаратылмақта.

“Өзбекнефтьгаз” АЖ басқармасы баслығының Америка Қурама Штатларының “Schlumberger” (SLB) компаниясының Азия-Тыныш океаны аймағы бойынша президенти менен өткерген ушырасыўында да бул ҳаққында сөз болды. Онда тәреплер өз-ара бирге ислесиўдиң ҳәзирги жағдайына, биргеликтеги жойбарларды әмелге асырыў процеси ҳәм нефть-газ тараўының перспективаларына итибар қаратты.

Сөйлесиў даўамында олар алдыңғы технологияларды енгизиў, нефть-газ операцияларының нәтийжелилигин арттырыў, санлы трансформацияны жеделлестириў ҳәм излеў, ислеп шығыў ҳәм кәнлерди басқарыўдың барлық басқышларында инновациялық шешимлерди енгизиўге қаратылған стратегиялық шерикликти раўажландырыўдан мәпдар екенин билдирди.

Сондай-ақ, Үстирт регионындағы кәнлерди комплексли басқарыўға қаратылған “Кәнлерди басқарыў системасы” (Field Management Application) жойбарын әмелге асырыў нәтийжелери додаланды. Жойбар шеңберинде ерисилген жетискенликлер атап өтилип, бар жумысшы мәселелер ҳәм оның кейинги басқышларын әмелге асырыў бойынша анық қәдемлер белгилеп алынды.

Ушырасыў даўамында санластырыў ҳәм жасалма интеллект технологияларын енгизиў мәселелерине де айрықша итибар қаратылды. Сөйлесиўлердиң жуўмағына бола, “Өзбекнефтьгаз” АЖ ҳәм SLB компаниясы санлы шешимлер, кәнлерди басқарыў ҳәм инновациялық технологияларды енгизиў тараўларында стратегиялық бирге ислесиўди және де беккемлеў ҳәм кеңейтиўге таяр екенин атап өтти.

Н.Зиёдуллаева,

ӨзА