Zamanagóy texnologiyalardı engiziw tek ǵana mámlekettiń neft-gaz tarawınıń nátiyjeliligin arttırıw emes, al investiciya hám innovaciya imkaniyatların keńeytiwde úlken áhmiyetke iye.
Sol sebepli, “Ózbekneftgaz” AJ hám xalıqaralıq abıraylı kompaniyalar arasındaǵı strategiyalıq ushırasıwlar turaqlı shólkemlestirilip, birgeliktegi joybarlardı ámelge asırıw hám sanlı sheshimlerdi engiziw baǵdarlarında birge islesiwdi bekkemlewge qaratılmaqta.
“Ózbekneftgaz” AJ basqarması baslıǵınıń Amerika Qurama Shtatlarınıń “Schlumberger” (SLB) kompaniyasınıń Aziya-Tınısh okeanı aymaǵı boyınsha prezidenti menen ótkergen ushırasıwında da bul haqqında sóz boldı. Onda tárepler óz-ara birge islesiwdiń házirgi jaǵdayına, birgeliktegi joybarlardı ámelge asırıw procesi hám neft-gaz tarawınıń perspektivalarına itibar qarattı.
Sóylesiw dawamında olar aldıńǵı texnologiyalardı engiziw, neft-gaz operaciyalarınıń nátiyjeliligin arttırıw, sanlı transformaciyanı jedellestiriw hám izlew, islep shıǵıw hám kánlerdi basqarıwdıń barlıq basqıshlarında innovaciyalıq sheshimlerdi engiziwge qaratılǵan strategiyalıq sheriklikti rawajlandırıwdan mápdar ekenin bildirdi.
Sonday-aq, Ústirt regionındaǵı kánlerdi kompleksli basqarıwǵa qaratılǵan “Kánlerdi basqarıw sisteması” (Field Management Application) joybarın ámelge asırıw nátiyjeleri dodalandı. Joybar sheńberinde erisilgen jetiskenlikler atap ótilip, bar jumısshı máseleler hám onıń keyingi basqıshların ámelge asırıw boyınsha anıq qádemler belgilep alındı.
Ushırasıw dawamında sanlastırıw hám jasalma intellekt texnologiyaların engiziw máselelerine de ayrıqsha itibar qaratıldı. Sóylesiwlerdiń juwmaǵına bola, “Ózbekneftgaz” AJ hám SLB kompaniyası sanlı sheshimler, kánlerdi basqarıw hám innovaciyalıq texnologiyalardı engiziw tarawlarında strategiyalıq birge islesiwdi jáne de bekkemlew hám keńeytiwge tayar ekenin atap ótti.

N.Ziyodullaeva,
ÓzA