“Жеңис парки” естелик комплексинде Ўатан тынышлығы жолында хызмет ўазыйпасын орынлаў ўақтында қаҳарманларша қайтыс болған пидайы гвардияшылардың естелигине бағышланған “Бизиң қаҳарманлар” китабының презентациясы болып өтти. Бул руўхый илаж мәртлик, ерлик ҳәм садықлық тымсалы болған ел перзентлерин еске алыўға бағышланды.

Шығармада Миллий гвардия системасында хызмет етип, хызмет ўазыйпасын орынлаў ўақтында жанын пидә еткен мәрт уллардың өмир жолы, мәртлиги ҳәм Ўатанға болған садықлығы сәўлеленген.

Еслеў китабының презентациясында Миллий гвардия сәркардалығы ўәкиллери, Өзбекстан Жазыўшылар аўқамының ағзалары, ветеранлар, қайтыс болған гвардияшылардың шаңарақ ағзалары, гвардияшылар ҳәм оқыўшы-жаслар қатнасты. Илажда шығып сөйлегенлер қаҳарманлардың естелиги бәрқулла халық қәлбинде жасайтуғынын, олардың мәртлиги болса жас әўлад ушын өмир мектеби екенин айрықша атап өтти.

Мәресим даўамында Ўатанға садықлық, пидайылық ҳәм парызға садықлық түсиниклери жоқары қәдирият сыпатында тән алынды. Қаҳарманлардың өмири ҳаққында сөз болар екен, тынышлық аңсатлық пенен келмейтуғыны, оны сақлаў болса ҳәр бир әўладтың муқаддес миннети екени атап өтилди.

“Бизиң қаҳарманлар” естелик китабы тек ғана естелик емес, ал келешек әўлад ушын ибрат мектеби болып хызмет етеди. Ол мәртликке шақырады, Ўатанға муҳаббатты беккемлейди ҳәм елдиң тынышлығы жолында жанын пидә еткен қаҳарманлардың естелигин мәңгилестиреди.

Н.Раҳмонова, У.Тўхтаев (видео), ӨзА