Орайлық банкте финанслық технологияларды раўажландырыўға бағышланған илаж болып өтти.

Өзбекстан Республикасы Президентиниң 2025-жыл 27-ноябрьдеги “Өзбекстанда финанслық технологиялар тараўын буннан былай да раўажландырыў илажлары ҳаққында”ғы қарарының орынланыўын тәмийинлеў мақсетинде Өзбекстан Республикасы Орайлық банкинде коммерциялық банклер, төлем шөлкемлери ҳәм финанслық технологиялар базары қатнасыўшылары менен мәжилис өткерилди.

Қарарға муўапық, 2026-2030-жылларда финанслық технологиялар тараўын раўажландырыў бойынша анық мақсетли көрсеткишлер белгиленди. Соның ишинде, тараўда жумыс алып барып атырған стартапларға 1 миллиард АҚШ доллары муғдарында сырт ел инвестицияларын тартыў, fintech базарында қатнасыўшылардың санын кеминде 200 ге жеткериў, 100 стартапты инкубация ҳәм акселерация бағдарламаларынан өткериў және кеминде 5 мың жасты финанслық технологиялар бағдарында оқытыў режелестирилген.

Бул мәжилисте 2026-2028-жылларға мөлшерленген режелер ҳәм Сингапурда өткерилген fintech илажы шеңберинде алға қойылған басламалар додаланды.

Орайлық банк тәрепинен мәжилис қатнасыўшыларына QR-кодлар арқалы төлемлерди әмелге асырыўдың бирден-бир стандартларын енгизиў, ашық банкинг тийкарында банклер ҳәм fintech компаниялар арасында қәўипсиз ҳәм стандартластырылған мағлыўмат алмасыў системасын енгизиў, реал ўақыт режиминде төлемлер ҳәм өткермелерди кеңейтиў, RegTech шешимлери тийкарында есабат ҳәм қадағалаў системаларын модернизациялаў ўазыйпалары белгиленди.

Сондай-ақ, Орайлық банк жанында шөлкемлестирилетуғын венчур фонды ҳәм инновациялық хаб жумысы шеңберинде финанслық технологиялар стартапларын қаржыландырыў, инкубация ҳәм акселерация бағдарламаларын кеңейтиў, сырт ел инвестицияларын тартыў мәселелерине айрықша итибар қаратылды.

Атап айтқанда, стартаплар дус келип атырған машқалалар, дәстүрий банк системасының кемшиликлери, сондай-ақ, акционерлер тәрепинен анық стратегия ҳәм системалы қатнастың жетиспейтуғыны мәселелерине итибар қаратылды. Жасалма интеллект бағдарында хакатон илажлары, 2026-жылдан баслап скоринг ҳәм маркетплаце платформаларын енгизиў режелери мәлим етилди.

Буннан тысқары, Open Bankingни P2P режиминде енгизиў, универсал QR-код системасын интеграциялаў ҳәм техникалық муўапықластырыў, басқарыў сапасын арттырыў мақсетинде data governance системасын раўажландырыў ҳәм Chief Data Officer (CDO)  лаўазымын енгизиў басламалары алға қойылды. Fintech ҳуб ҳәм акселерация бағдарламаларын шөлкемлестириў режелери де жәрияланды.

Семинар шеңберинде миллий fintech стратегиясын ислеп шығыў ҳәм оны әмелиятқа енгизиў, fintech тараўында жаңа кадрларды таярлаў ҳәм хошаметлеў, fintech компаниялары ҳәм оларды басқарыўшы қәнигелер менен бирге ислесиў байланысларын жолға қойыў атап өтилди.

Сондай-ақ, жасалма интеллект лабораторияларын шөлкемлестириў бойынша усыныслар билдирилди. Соның ишинде, банк стартапларын жасалма интеллект лабораторияларына бағдарлаў, аймақларда жасалма интеллект лабораторияларын шөлкемлестириў ҳәм жас кадрларды таярлаў Президент пәрманында белгиленген болып, коммерциялық банклер де бул процессте белсене қатнасатуғыны атап өтилди.

Шаҳноза Маматуропова,

Аслиддин АЛИЖАНОВ (сүўрет), ӨзА