Oraylıq bankte finanslıq texnologiyalardı rawajlandırıwǵa baǵıshlanǵan ilaj bolıp ótti.

Ózbekstan Respublikası Prezidentiniń 2025-jıl 27-noyabrdegi “Ózbekstanda finanslıq texnologiyalar tarawın bunnan bılay da rawajlandırıw ilajları haqqında”ǵı qararınıń orınlanıwın támiyinlew maqsetinde Ózbekstan Respublikası Oraylıq bankinde kommerciyalıq bankler, tólem shólkemleri hám finanslıq texnologiyalar bazarı qatnasıwshıları menen májilis ótkerildi.
Qararǵa muwapıq, 2026-2030-jıllarda finanslıq texnologiyalar tarawın rawajlandırıw boyınsha anıq maqsetli kórsetkishler belgilendi. Sonıń ishinde, tarawda jumıs alıp barıp atırǵan startaplarǵa 1 milliard AQSh dolları muǵdarında sırt el investiciyaların tartıw, fintech bazarında qatnasıwshılardıń sanın keminde 200 ge jetkeriw, 100 startaptı inkubaciya hám akseleraciya baǵdarlamalarınan ótkeriw jáne keminde 5 mıń jastı finanslıq texnologiyalar baǵdarında oqıtıw rejelestirilgen.
Bul májiliste 2026-2028-jıllarǵa mólsherlengen rejeler hám Singapurda ótkerilgen fintech ilajı sheńberinde alǵa qoyılǵan baslamalar dodalandı.
Oraylıq bank tárepinen májilis qatnasıwshılarına QR-kodlar arqalı tólemlerdi ámelge asırıwdıń birden-bir standartların engiziw, ashıq banking tiykarında bankler hám fintech kompaniyalar arasında qáwipsiz hám standartlastırılǵan maǵlıwmat almasıw sistemasın engiziw, real waqıt rejiminde tólemler hám ótkermelerdi keńeytiw, RegTech sheshimleri tiykarında esabat hám qadaǵalaw sistemaların modernizaciyalaw wazıypaları belgilendi.
Sonday-aq, Oraylıq bank janında shólkemlestiriletuǵın venchur fondı hám innovaciyalıq xab jumısı sheńberinde finanslıq texnologiyalar startapların qarjılandırıw, inkubaciya hám akseleraciya baǵdarlamaların keńeytiw, sırt el investiciyaların tartıw máselelerine ayrıqsha itibar qaratıldı.
Atap aytqanda, startaplar dus kelip atırǵan mashqalalar, dástúriy bank sistemasınıń kemshilikleri, sonday-aq, akcionerler tárepinen anıq strategiya hám sistemalı qatnastıń jetispeytuǵını máselelerine itibar qaratıldı. Jasalma intellekt baǵdarında xakaton ilajları, 2026-jıldan baslap skoring hám marketplace platformaların engiziw rejeleri málim etildi.
Bunnan tısqarı, Open Bankingni P2P rejiminde engiziw, universal QR-kod sistemasın integraciyalaw hám texnikalıq muwapıqlastırıw, basqarıw sapasın arttırıw maqsetinde data governance sistemasın rawajlandırıw hám Chief Data Officer (CDO) lawazımın engiziw baslamaları alǵa qoyıldı. Fintech hub hám akseleraciya baǵdarlamaların shólkemlestiriw rejeleri de járiyalandı.
Seminar sheńberinde milliy fintech strategiyasın islep shıǵıw hám onı ámeliyatqa engiziw, fintech tarawında jańa kadrlardı tayarlaw hám xoshametlew, fintech kompaniyaları hám olardı basqarıwshı qánigeler menen birge islesiw baylanısların jolǵa qoyıw atap ótildi.
Sonday-aq, jasalma intellekt laboratoriyaların shólkemlestiriw boyınsha usınıslar bildirildi. Sonıń ishinde, bank startapların jasalma intellekt laboratoriyalarına baǵdarlaw, aymaqlarda jasalma intellekt laboratoriyaların shólkemlestiriw hám jas kadrlardı tayarlaw Prezident pármanında belgilengen bolıp, kommerciyalıq bankler de bul processte belsene qatnasatuǵını atap ótildi.

Shahnoza Mamaturopova,
Asliddin ALIJANOV (súwret), ÓzA