Өзбекстан көркем өнер академиясы Қарақалпақстан бөлиминиң көргизбелер сарайында Қазақ миллий дизайн академиясының академиги Тазабийке Салиева ҳәм Исмет Айымбетовтың өнерментшилик дөретпелеринен ибарат «Диалог: дәстүр ҳәм заманагөйлик» атамасындағы көргизбе болып өтти.

Илажға Қазақстан Республикасының Евродизайнерлер шеңбери ағзаларының ўәкиллери, көркем өнер ықласбентлери, дизайнерлер ҳәм студент-жаслар қатнасты.

Экспозицияда фелтинг, қурғақ жүн менен ислеў ҳәм сүўрет салыў өнери арқалы орынланған жумыслар қойылды. Шығармаларда миллий дәстүр ҳәм заманагөй көркем усыллардың өз-ара үнлеслиги айқын көринеди.

– Халқымызға белгили әдебияттаныўшы, жазыўшы, профессор Қаллы Айымбетовтың шаўлығы И.Айымбетовтың өнерментшилик дөретпелери майда деталлардан қуралған киши инсталляцияллық көринислерден ибарат болып, бул көркем өнерге қызығыўшылық әўладтан-әўладқа өтип киятырған дөретиўшилик басқыш екенлигин көриўимиз мүмкин. Ал, Т.Салиева қарақалпақ миллий көркем өнер дәстүрлерин заманагөй көринислерде сәўлелендирип, байланыстырып келмекте. Қазақстан Республикасының Астана қаласындағы Жайҳун қарақалпақ миллий этномәдений орайын, «Vivat Dance Астана» студиясын басқарыў менен бирге миллий мәденият ҳәм заманагөй дөретиўшиликти үйлестирген өнерментшилик жумысларын да алып барады, – дейди Өзбекстан Көркем өнер академиясы Қарақалпақстан бөлиминиң баслығы Улбосын Утегенова.

Көргизбениң мақсети –   дәстүрий өнерментшиликти заманагөй форматта таныстырыў, мәдений мийрас ҳәм ҳәзирги заман арасындағы дөретиўшилик диалогты раўажландырыў болып табылады.

Қарақалпақстан хабар агентлиги.

М.Ҳабибуллаевтың түсирген сүўретлери