Ózbekstan kórkem óner akademiyası Qaraqalpaqstan bóliminiń kórgizbeler sarayında Qazaq milliy dizayn akademiyasınıń akademigi Tazabiyke Salieva hám Ismet Ayımbetovtıń ónermentshilik dóretpelerinen ibarat «Dialog: dástúr hám zamanagóylik» atamasındaǵı kórgizbe bolıp ótti.

Ilajǵa Qazaqstan Respublikasınıń Evrodizaynerler sheńberi aǵzalarınıń wákilleri, kórkem óner ıqlasbentleri, dizaynerler hám student-jaslar qatnastı.
Ekspoziciyada felting, qurǵaq jún menen islew hám súwret salıw óneri arqalı orınlanǵan jumıslar qoyıldı. Shıǵarmalarda milliy dástúr hám zamanagóy kórkem usıllardıń óz-ara únlesligi ayqın kórinedi.
– Xalqımızǵa belgili ádebiyattanıwshı, jazıwshı, professor Qallı Ayımbetovtıń shawlıǵı I.Ayımbetovtıń ónermentshilik dóretpeleri mayda detallardan quralǵan kishi installyaciyallıq kórinislerden ibarat bolıp, bul kórkem ónerge qızıǵıwshılıq áwladtan-áwladqa ótip kiyatırǵan dóretiwshilik basqısh ekenligin kóriwimiz múmkin. Al, T.Salieva qaraqalpaq milliy kórkem óner dástúrlerin zamanagóy kórinislerde sáwlelendirip, baylanıstırıp kelmekte. Qazaqstan Respublikasınıń Astana qalasındaǵı Jayhun qaraqalpaq milliy etnomádeniy orayın, «Vivat Dance Astana» studiyasın basqarıw menen birge milliy mádeniyat hám zamanagóy dóretiwshilikti úylestirgen ónermentshilik jumısların da alıp baradı, – deydi Ózbekstan Kórkem óner akademiyası Qaraqalpaqstan bóliminiń baslıǵı Ulbosın Utegenova.
Kórgizbeniń maqseti – dástúriy ónermentshilikti zamanagóy formatta tanıstırıw, mádeniy miyras hám házirgi zaman arasındaǵı dóretiwshilik dialogtı rawajlandırıw bolıp tabıladı.

Qaraqalpaqstan xabar agentligi.
M.Habibullaevtıń túsirgen súwretleri.