АҚШ Президенти Дональд Трамп бир ҳәпте алдын ўақыядан жүдә ашыўланғанына, бундай ҳәрекетти қабыл етип болмайтуғынын айтқанына қарамастан, декабрь айының ақырында Украина дронлары Россия басшысы Владимир Путинниң резиденциясына ҳүжим еткенине гүманланды.

– Бул ҳүжим ҳақыйқатында да әмелге асырылғанына исенбеймен, – деген ол журналистлерге. – Жақында бир нәрсе болды, бирақ бул ўақыяға қатнасы жоқ…

РФ сыртқы ислер министри Сергей Лавров алдынырақ Киев режими 29-декабрь күни түнде 91 дрон жәрдеминде Путинниң Новгород ўәлаятындағы резиденциясына терроршылық ҳүжими шөлкемлестирилгенин айтқан еди. Барлық ушыўшысыз самолётлар ҳаўа қорғаныў күшлери тәрепинен жоқ етилгени атап өтилип, қурбанлар ҳаққында мағлыўмат берилмеген.

– Киев режиминиң Президент резиденциясына ҳүжиминен соң АҚШ қатнасыўындағы сөйлесиўди тоқтатыў нийетинде емеспиз, – деген Россия сыртқы сиясат уйымының басшысы. – Тек позициямыз қайта көрип шығылады.

С.Раҳимов, ӨзА