“Өзбекнефтьгаз” акционерлик жәмийети нефть-газ тармағында турақлы раўажланыўды тәмийинлеў, геологиялық-излеў жумысларының көлемин кеңейтиў ҳәм өндирис нәтийжелилигин арттырыў мақсетинде халықаралық шерикликти жедел раўажландырып келмекте.

Усы бағдарда жәмийет басшылығы Қытай Халық Республикасының нефть-газ тараўында жумыс алып барып атырған “GR Xibu Buling Engineering Company”, “China 3 National Logging”, “Great Wall Drilling Company”,  сондай-ақ, ““New Silk Road Oil and Gas”  қоспа кәрханасының ўәкиллери менен жумысшы ушырасыў өткерди.

Сөйлесиўлер даўамында тәреплер ҳәзирги бирге ислесиў жағдайын таллап, 2026-жылға мөлшерленген биргеликтеги режелерди додалады. Атап айтқанда, геологиялық-излеў жумысларын жеделлестириў, углеводород резервлерин анықлаў, излеў ҳәм өзлестириў бойынша қоспа басламаларды әмелге асырыў мәселелерине айрықша итибар қаратылды.

Ушырасыўда бурғылаў жумысларында алдынғы технологиялық шешимлерди енгизиў, өндирис процесслеринде заманагөй сервис хызметлеринен пайдаланыў ҳәм Қытай компанияларының “Өзбекнефтьгаз” АЖ системасында инвестициялық ҳәм өндирислик жойбарларда қатнасыў имканиятлары додаланды. Онда бундай бирге ислесиў нефть-газ тараўында нәтийжелиликти арттырыў ҳәм жаңа имканиятларды ашыўға хызмет ететуғыны атап өтилди.

“Өзбекнефтьгаз” АЖ басқармасы баслығы Абдугани Сангинов жәмийет маман, тәжирийбели ҳәм исенимли жумысты бөлип алып ислеўши ҳәм сервис шөлкемлери менен ашық бирге ислесиўге таяр екенин билдирип, биргеликтеги жойбарлар халықаралық стандартлар ҳәм белгиленген талапларға тийкарланып бәсекиге шыдамлы техникалық-экономикалық усыныслар тийкарында әмелге асырылатуғынын атап өтти.

Жәмийеттиң мәлимлеме хызметиниң хабарына бола, тәреплер исбилерменлик байланысларын буннан былай да беккемлеў, әмелий сөйлесиўди избе-из даўам еттириў ҳәм тийкарғы бағдарлар бойынша бирге ислесиўди басқышпа-басқыш раўажландырыўдан өз-ара мәпдар екенин билдирди.

Н.Зиёдуллаева, ӨзА