“Ózbekneftgaz” akcionerlik jámiyeti neft-gaz tarmaǵında turaqlı rawajlanıwdı támiyinlew, geologiyalıq-izlew jumıslarınıń kólemin keńeytiw hám óndiris nátiyjeliligin arttırıw maqsetinde xalıqaralıq sheriklikti jedel rawajlandırıp kelmekte.

Usı baǵdarda jámiyet basshılıǵı Qıtay Xalıq Respublikasınıń neft-gaz tarawında jumıs alıp barıp atırǵan “GR Xibu Buling Engineering Company”, “China 3 National Logging”, “Great Wall Drilling Company”, sonday-aq, ““New Silk Road Oil and Gas” qospa kárxanasınıń wákilleri menen jumısshı ushırasıw ótkerdi.
Sóylesiwler dawamında tárepler házirgi birge islesiw jaǵdayın tallap, 2026-jılǵa mólsherlengen birgeliktegi rejelerdi dodaladı. Atap aytqanda, geologiyalıq-izlew jumısların jedellestiriw, uglevodorod rezervlerin anıqlaw, izlew hám ózlestiriw boyınsha qospa baslamalardı ámelge asırıw máselelerine ayrıqsha itibar qaratıldı.
Ushırasıwda burǵılaw jumıslarında aldınǵı texnologiyalıq sheshimlerdi engiziw, óndiris processlerinde zamanagóy servis xızmetlerinen paydalanıw hám Qıtay kompaniyalarınıń “Ózbekneftgaz” AJ sistemasında investiciyalıq hám óndirislik joybarlarda qatnasıw imkaniyatları dodalandı. Onda bunday birge islesiw neft-gaz tarawında nátiyjelilikti arttırıw hám jańa imkaniyatlardı ashıwǵa xızmet etetuǵını atap ótildi.
“Ózbekneftgaz” AJ basqarması baslıǵı Abdugani Sanginov jámiyet maman, tájiriybeli hám isenimli jumıstı bólip alıp islewshi hám servis shólkemleri menen ashıq birge islesiwge tayar ekenin bildirip, birgeliktegi joybarlar xalıqaralıq standartlar hám belgilengen talaplarǵa tiykarlanıp básekige shıdamlı texnikalıq-ekonomikalıq usınıslar tiykarında ámelge asırılatuǵının atap ótti.
Jámiyettiń málimleme xızmetiniń xabarına bola, tárepler isbilermenlik baylanısların bunnan bılay da bekkemlew, ámeliy sóylesiwdi izbe-iz dawam ettiriw hám tiykarǵı baǵdarlar boyınsha birge islesiwdi basqıshpa-basqısh rawajlandırıwdan óz-ara mápdar ekenin bildirdi.

N.Ziyodullaeva, ÓzA