Халық депутатлары Мойнақ районлық Кеңесиниң гезектеги сессиясы болып өтти. Онда район турмысы ушын әҳмийетли болған мәселелер қатарында шөлкемлестириў мәселеси де көрип шығылды.

Жаңа редакциядағы Өзбекстан Республикасы Конституциясының 120-статьясына муўапық, буннан былай Халық депутатлары Кеңесине ҳәким емес, ал депутатлар арасынан сайланған баслық басшылық етеди. Ҳәким ҳәм Кеңес баслығы лаўазымларын бир шахс ийелеўи мүмкин емес. Бул тәртип 2024-жылы ўәлаятларда ҳәм Ташкент қаласында енгизилген, 2026-жыл 1-январьдан баслап барлық район ҳәм қалалық Кеңеслерге енгизилиўи белгиленген.

Усы тийкарда, бүгинги сессияда “Жергиликли мәмлекетлик ҳәкимият ҳаққында”ғы Нызамның 163-статьясына муўапық, Халық депутатлары Мойнақ районлық Кеңеси баслығының сайлаўы өткерилди. Талабанлар сиясий партиялардың ўәкиллери тәрепинен усыныс етилди.

Ашық-айдын ҳәм нызамлы сайлаў нәтийжесинде, депутат Абдижаббар Тлеуов Халық депутатлары Мойнақ районлық Кеңесиниң баслығы етип сайланды.

Бул – жергиликли ўәкиллик ҳәкимиятында ашық-айдынлық, турақлылық ҳәм жуўапкершиликти күшейтиўге қаратылған әҳмийетли қәдем болып есапланады.

Сессия даўамында район турмысының әҳмийетли бағдарлары бойынша есабатлар ҳәм режелер додаланды. Атап айтқанда, 2025-жылы Мойнақ районын социаллық-экономикалық раўажландырыў бойынша әмелге асырылған жумыслар ҳәм 2026-жылға мөлшерленген режелер, «Ҳаял-қызлар дәптери”ниң алтыншы басқышы шеңберинде дизимге алынған ҳаял-қызларды белгиленген тәртипте дизимнен шығарыў мәселелери,  мәҳәллелер системасы, руўхый-ағартыўшылық тараў ҳәм мәмлекетлик тил бойынша 2025-жыл даўамында әмелге асырылған жумыслар, 2026-жыл ушын жергиликли бюджеттиң тийкарғы көрсеткишлери ҳәм финанслық параметрлерин тастыйықлаў, 2026-жылда Мойнақ районын комплексли раўажландырыў бағдарламасы мәселелери көрип шығылып, барлық мәселелер бойынша тийисли қарарлар қабыл етилди.

Қарақалпақстан хабар агентлиги