Xalıq deputatları Moynaq rayonlıq Keńesiniń gezektegi sessiyası bolıp ótti. Onda rayon turmısı ushın áhmiyetli bolǵan máseleler qatarında shólkemlestiriw máselesi de kórip shıǵıldı.

Jańa redakciyadaǵı Ózbekstan Respublikası Konstituciyasınıń 120-statyasına muwapıq, bunnan bılay Xalıq deputatları Keńesine hákim emes, al deputatlar arasınan saylanǵan baslıq basshılıq etedi. Hákim hám Keńes baslıǵı lawazımların bir shaxs iyelewi múmkin emes. Bul tártip 2024-jılı wálayatlarda hám Tashkent qalasında engizilgen, 2026-jıl 1-yanvardan baslap barlıq rayon hám qalalıq Keńeslerge engiziliwi belgilengen.
Usı tiykarda, búgingi sessiyada “Jergilikli mámleketlik hákimiyat haqqında”ǵı Nızamnıń 163-statyasına muwapıq, Xalıq deputatları Moynaq rayonlıq Keńesi baslıǵınıń saylawı ótkerildi. Talabanlar siyasiy partiyalardıń wákilleri tárepinen usınıs etildi.
Ashıq-aydın hám nızamlı saylaw nátiyjesinde, deputat Abdijabbar Tleuov Xalıq deputatları Moynaq rayonlıq Keńesiniń baslıǵı etip saylandı.
Bul – jergilikli wákillik hákimiyatında ashıq-aydınlıq, turaqlılıq hám juwapkershilikti kúsheytiwge qaratılǵan áhmiyetli qádem bolıp esaplanadı.
Sessiya dawamında rayon turmısınıń áhmiyetli baǵdarları boyınsha esabatlar hám rejeler dodalandı. Atap aytqanda, 2025-jılı Moynaq rayonın sociallıq-ekonomikalıq rawajlandırıw boyınsha ámelge asırılǵan jumıslar hám 2026-jılǵa mólsherlengen rejeler, «Hayal-qızlar dápteri”niń altınshı basqıshı sheńberinde dizimge alınǵan hayal-qızlardı belgilengen tártipte dizimnen shıǵarıw máseleleri, máhálleler sisteması, ruwxıy-aǵartıwshılıq taraw hám mámleketlik til boyınsha 2025-jıl dawamında ámelge asırılǵan jumıslar, 2026-jıl ushın jergilikli byudjettiń tiykarǵı kórsetkishleri hám finanslıq parametrlerin tastıyıqlaw, 2026-jılda Moynaq rayonın kompleksli rawajlandırıw baǵdarlaması máseleleri kórip shıǵılıp, barlıq máseleler boyınsha tiyisli qararlar qabıl etildi.

Qaraqalpaqstan xabar agentligi