Бирлескен Араб Әмирликлериниң Дубай қаласында бокс бойынша ересеклер арасындағы IBA яғный Халықаралық  бокс ассосациясы тәрепинен Жәҳән чемпионаты өткерилмекте.

Дүнья жүзиниң 118 мәмлекетинен ең күшли боксшилер қатнасып атырған бул жарыста спортшылар 13 салмақ категориясы бойынша өз-ара беллеспекте.

Соның ишинде, мәмлекетимиз боксшилери де табыслы қатнасып, кеше өткерилген шерек финал беллесиўлеринде 11 боксшимизден 9 боксши өз қарсыласларын жеңип, ярым финал жолламасын қолға киргизиўге миясар болды.

Атап айтқанда,  48 кг салмақта Шодиёржон Мелиқўзиев әзербайжанлы Субхан Мамедовқа, 86 кг да Акмалжон Исроилов россиялы Шарабутдин Атаевқа жеңилип қалған болса, 54 кг да Асилбек Жалилов  сербиялы Артур Нагапетянды, 60 кг да Абдумалик Халоков әзербайжанлы Маҳаммадали Аширалиевты, 67 кг да Асадхожа Мўйдинхўжаев қазақстанлы Санатали Талтаевты, 75 кг да Фазлиддин Эркинбоев әзербайжанлы Саиджамшид Жафаровты, +92 кг да Арман Маханов кубалы Алехандро Лопести, 51 кг да Ҳасанбой Дўстматов тәжикстанлы Мерож Суфижоновты, 57 кг да Хожаназар Нортожиев армениялы Жираир Сарисянды, 80 кг да Жавоҳир Умматалиев сербиялы Артём Агеевти, 92 кг да Тўрабек Хабибуллаев кубалы Хулио Сезар Ла Крузды жеңип шығыўға еристи.

Соны айтып өтиўимиз керек, жәҳән чемпионатының ярым финалына Россияда 13, Өзбекстаннан 9, Қазақстаннан 6, Армениядан 5, Әзербайжаннан 3, Грузия, Замбия, Испания, Қырғызстан ҳәм Тәжикстаннан 2, Беларус ҳәм Кубадан 1 боксши жолламаны қолға киргизди.

Бүгин ярым финал беллесиўлери болып өтеди.

Адилбай Оразов,

Қарақалпақстан хабар агентлиги шолыўшысы