Birlesken Arab Ámirlikleriniń Dubay qalasında boks boyınsha eresekler arasındaǵı IBA yaǵnıy Xalıqaralıq boks assosaciyası tárepinen Jáhán chempionatı ótkerilmekte.

Dúnya júziniń 118 mámleketinen eń kúshli boksshiler qatnasıp atırǵan bul jarısta sportshılar 13 salmaq kategoriyası boyınsha óz-ara bellespekte.
Sonıń ishinde, mámleketimiz boksshileri de tabıslı qatnasıp, keshe ótkerilgen sherek final bellesiwlerinde 11 boksshimizden 9 boksshi óz qarsılasların jeńip, yarım final jollamasın qolǵa kirgiziwge miyasar boldı.
Atap aytqanda, 48 kg salmaqta Shodiyorjon Meliqwziev ázerbayjanlı Subxan Mamedovqa, 86 kg da Akmaljon Isroilov rossiyalı Sharabutdin Ataevqa jeńilip qalǵan bolsa, 54 kg da Asilbek Jalilov serbiyalı Artur Nagapetyandı, 60 kg da Abdumalik Xalokov ázerbayjanlı Mahammadali Ashiralievtı, 67 kg da Asadxoja Mwydinxwjaev qazaqstanlı Sanatali Taltaevtı, 75 kg da Fazliddin Erkinboev ázerbayjanlı Saidjamshid Jafarovtı, +92 kg da Arman Maxanov kubalı Alexandro Lopesti, 51 kg da Hasanboy Dwstmatov tájikstanlı Meroj Sufijonovtı, 57 kg da Xojanazar Nortojiev armeniyalı Jirair Sarisyandı, 80 kg da Javohir Ummataliev serbiyalı Artyom Ageevti, 92 kg da Twrabek Xabibullaev kubalı Xulio Sezar La Kruzdı jeńip shıǵıwǵa eristi.
Sonı aytıp ótiwimiz kerek, jáhán chempionatınıń yarım finalına Rossiyada 13, Ózbekstannan 9, Qazaqstannan 6, Armeniyadan 5, Ázerbayjannan 3, Gruziya, Zambiya, Ispaniya, Qırǵızstan hám Tájikstannan 2, Belarus hám Kubadan 1 boksshi jollamanı qolǵa kirgizdi.
Búgin yarım final bellesiwleri bolıp ótedi.

Adilbay Orazov,
Qaraqalpaqstan xabar agentligi sholıwshısı