Әжинияз атындағы Нөкис мәмлекетлик педагогикалық институтында елимизге белгили математика пәни оқытыўшыларының қатнасыўында «Үш әўлад ушырасыўы» шөлкемлестирилди.

Өзбекстан ҳәм Қарақалпақстан Республикаларына мийнети сиңген халық билимлендириў хызметкери, институттың математика кафедрасының үлкен оқытыўшысы Жеңисбай Жумамуратов тәрепинен шөлкемлестирилген илажға билимлендириў системасының барлық буўынларын нәтийжели жумыс ислеп атырған математика пәни оқытыўшылары, устазлар, жас излениўшилер ҳәм студентлер өз-ара тәжирийбе алмасып, устаз-шәкирт дәстүрлерин беккемлеў ҳәм билимлендириўдиң сапасын арттырыў мәселелерин додалады.

Ушырасыўда оқыў ислери бойынша проректоры М.Ибрагимов, Анық пәнлер факультетиниң деканы Р.Жийемуратов, математика кафедрасының баслығы, профессор Б.Пренов, сондай-ақ, мийман устазлар өзлериниң бай педагогикалық хызметлери, заманагөй билимлендириў методикалары ҳәм математика пәнин оқытыўдағы нәтийжели методлар бойынша пикирлерин билдирди.

Студент-жаслар өзлерин қызықтырған сораўларға жуўаплар алды.

Қарақалпақстан хабар агентлиги