Ájiniyaz atındaǵı Nókis mámleketlik pedagogikalıq institutında elimizge belgili matematika páni oqıtıwshılarınıń qatnasıwında «Úsh áwlad ushırasıwı» shólkemlestirildi.

Ózbekstan hám Qaraqalpaqstan Respublikalarına miyneti sińgen xalıq bilimlendiriw xızmetkeri, instituttıń matematika kafedrasınıń úlken oqıtıwshısı Jeńisbay Jumamuratov tárepinen shólkemlestirilgen ilajǵa bilimlendiriw sistemasınıń barlıq buwınların nátiyjeli jumıs islep atırǵan matematika páni oqıtıwshıları, ustazlar, jas izleniwshiler hám studentler óz-ara tájiriybe almasıp, ustaz-shákirt dástúrlerin bekkemlew hám bilimlendiriwdiń sapasın arttırıw máselelerin dodaladı.
Ushırasıwda oqıw isleri boyınsha prorektorı M.Ibragimov, Anıq pánler fakultetiniń dekanı R.Jiyemuratov, matematika kafedrasınıń baslıǵı, professor B.Prenov, sonday-aq, miyman ustazlar ózleriniń bay pedagogikalıq xızmetleri, zamanagóy bilimlendiriw metodikaları hám matematika pánin oqıtıwdaǵı nátiyjeli metodlar boyınsha pikirlerin bildirdi.
Student-jaslar ózlerin qızıqtırǵan sorawlarǵa juwaplar aldı.

Qaraqalpaqstan xabar agentligi