Морокконың Марракеш қаласында Халықаралық суў ресурслары ассоциациясының ХИХ жер жүзилик суў конгресси өз жумысын даўам еттирмекте. 1-декабрьден 5-декабрьге шекем “Өзгерип атырған дүня шараятында суў: инновация ҳәм бейимлесиў” атамасында шөлкемлестирилген бул абырайлы әнжуман глобал суў системаларын беккемлеў ҳәм турақлы келешекти тәмийинлеўге қаратылған инновациялық шешимлерди додалаўға бағышланған.

Конгресс ең ири илимий-әмелий илажлардан бири болып, онда 100 ден аслам мәмлекетлерден халықаралық експертлер, илимпазлар, халықаралық шөлкемлер, суў тәмийнаты ҳәм ирригация тараўының қәнигелери қатнаспақта. Сонлықтан, илажда алдыңғы тәжирийбелерди үйрениў, әмелий жойбарларды таллаў ҳәм халықаралық бирге ислесиўди раўажландырыў имканиятлары кеңнен ашылған.
Өзбекстан Республикасы Президенти Администрациясы басшысының суў тәмийнаты системасын реформалаў бойынша орынбасары Тимур Бутунбоев басшылығындағы делегация конгрессте белсене қатнаспақта. Делегация қатнасыўшылары миллий тәжирийбе тийкарында инновациялық көзқарасларды усыныў менен бирге, суў қәўипсизлиги, турақлы раўажланыў, климат өзгериўи ҳәм оның суў ресурсларына тәсири, ирригация ҳәм аўыл хожалығы суў тәмийнаты, қала ҳәм аўыл суў системаларын раўажландырыў сыяқлы әҳмийетли мәселелерди додаламақта. Сондай-ақ, инновациялық технологияларды енгизиў, суў дипломатиясы ҳәм трансшегаралық суў ресурсларын басқарыў мәселелери де конгресс күн тәртибинен әҳмийетли орын ийелеген.
Конгресс шеңберинде Өзбекстан делегациясы бир қатар еки тәреплеме ушырасыўлар өткерди. Соның ишинде, Т.Бутунбоев ҳәм Морокконың тәмийнат ҳәм суў министри Низар Барака арасында болып өткен сөйлесиўде суў тәмийнаты ҳәм суў хожалығы тараўындағы келешектеги бирге ислесиў бағдарлары белгилеп алынды. Тәреплер биргеликтеги басламаларды әмелге асырыў, тәжирийбе алмасыўды кеңейтиў ҳәм еки мәмлекет арасындағы өз-ара байланысларды беккемлеў мәселелерин додалады. Ушырасыў жуўмағында Т.Бутунбаев Морокко министрине үш тилде басып шығарылған Өзбекстан Республикасының Суў кодексин усынды. Бул суўды басқарыў тараўында ҳуқықый тәжирийбе алмасыўды және де беккемлеўге хызмет ететуғыны атап өтилди.
Сондай-ақ, конгресс шеңберинде өткерилген халықаралық көргизбеде Өзбекстан делегациясы белсене қатнасты. Көргизбеде Морокконың суў ресурсларын басқарыў бойынша әмелий жумыслары, заманагөй технологиялар ҳәм инновациялық өнимлер таныстырылды. Бул делегацияға халықаралық көлемде қолланылып атырған нәтийжели шешимлерди көриў, оларды өз тәжирийбеси менен салыстырыў ҳәм халықаралық қәнигелер менен пикирлесиў имканиятын берди.
Өткерилген илажда Өзбекстан делегациясының қатнасыўы мәмлекеттиң суў ресурсларын турақлы басқарыў, инновациялық қатнасларды енгизиў ҳәм халықаралық бирге ислесиўди раўажландырыў бойынша алдыңғы басламаларды кең жәмийетшиликке жеткериўге хызмет етпекте. Конгресс жуўмағында күтилип атырған нәтийжелер Өзбекстанның глобал суў сиясаты ҳәм турақлы раўажланыў стратегиясын және де беккемлеўге жәрдем береди.

Нилуфар Бозорова, ӨзА