Morokkonıń Marrakesh qalasında Xalıqaralıq suw resursları associaciyasınıń XIX jer júzilik suw kongressi óz jumısın dawam ettirmekte. 1-dekabrden 5-dekabrge shekem “Ózgerip atırǵan dúnya sharayatında suw: innovaciya hám beyimlesiw” atamasında shólkemlestirilgen bul abıraylı ánjuman global suw sistemaların bekkemlew hám turaqlı keleshekti támiyinlewge qaratılǵan innovaciyalıq sheshimlerdi dodalawǵa baǵıshlanǵan.

Kongress eń iri ilimiy-ámeliy ilajlardan biri bolıp, onda 100 den aslam mámleketlerden xalıqaralıq ekspertler, ilimpazlar, xalıqaralıq shólkemler, suw támiynatı hám irrigaciya tarawınıń qánigeleri qatnaspaqta. Sonlıqtan, ilajda aldıńǵı tájiriybelerdi úyreniw, ámeliy joybarlardı tallaw hám xalıqaralıq birge islesiwdi rawajlandırıw imkaniyatları keńnen ashılǵan.
Ózbekstan Respublikası Prezidenti Administraciyası basshısınıń suw támiynatı sistemasın reformalaw boyınsha orınbasarı Timur Butunboev basshılıǵındaǵı delegaciya kongresste belsene qatnaspaqta. Delegaciya qatnasıwshıları milliy tájiriybe tiykarında innovaciyalıq kózqaraslardı usınıw menen birge, suw qáwipsizligi, turaqlı rawajlanıw, klimat ózgeriwi hám onıń suw resurslarına tásiri, irrigaciya hám awıl xojalıǵı suw támiynatı, qala hám awıl suw sistemaların rawajlandırıw sıyaqlı áhmiyetli máselelerdi dodalamaqta. Sonday-aq, innovaciyalıq texnologiyalardı engiziw, suw diplomatiyası hám transshegaralıq suw resursların basqarıw máseleleri de kongress kún tártibinen áhmiyetli orın iyelegen.
Kongress sheńberinde Ózbekstan delegaciyası bir qatar eki tárepleme ushırasıwlar ótkerdi. Sonıń ishinde, T.Butunboev hám Morokkonıń támiynat hám suw ministri Nizar Baraka arasında bolıp ótken sóylesiwde suw támiynatı hám suw xojalıǵı tarawındaǵı keleshektegi birge islesiw baǵdarları belgilep alındı. Tárepler birgeliktegi baslamalardı ámelge asırıw, tájiriybe almasıwdı keńeytiw hám eki mámleket arasındaǵı óz-ara baylanıslardı bekkemlew máselelerin dodaladı. Ushırasıw juwmaǵında T.Butunbaev Morokko ministrine úsh tilde basıp shıǵarılǵan Ózbekstan Respublikasınıń Suw kodeksin usındı. Bul suwdı basqarıw tarawında huqıqıy tájiriybe almasıwdı jáne de bekkemlewge xızmet etetuǵını atap ótildi.
Sonday-aq, kongress sheńberinde ótkerilgen xalıqaralıq kórgizbede Ózbekstan delegaciyası belsene qatnastı. Kórgizbede Morokkonıń suw resursların basqarıw boyınsha ámeliy jumısları, zamanagóy texnologiyalar hám innovaciyalıq ónimler tanıstırıldı. Bul delegaciyaǵa xalıqaralıq kólemde qollanılıp atırǵan nátiyjeli sheshimlerdi kóriw, olardı óz tájiriybesi menen salıstırıw hám xalıqaralıq qánigeler menen pikirlesiw imkaniyatın berdi.
Ótkerilgen ilajda Ózbekstan delegaciyasınıń qatnasıwı mámlekettiń suw resursların turaqlı basqarıw, innovaciyalıq qatnaslardı engiziw hám xalıqaralıq birge islesiwdi rawajlandırıw boyınsha aldıńǵı baslamalardı keń jámiyetshilikke jetkeriwge xızmet etpekte. Kongress juwmaǵında kútilip atırǵan nátiyjeler Ózbekstannıń global suw siyasatı hám turaqlı rawajlanıw strategiyasın jáne de bekkemlewge járdem beredi.

Nilufar Bozorova, ÓzA