Будапешт қаласына рәсмий сапары шеңберинде Олий Мажлис Сенатының Баслығы Танзила Норбоева Венгрия Президенти Тамаш Шуёк пенен ушырасты.

Өз-ара сөйлесиўде еки мәмлекет арасындағы бирге ислесиўдиң сезилерли жеделлескени ҳәм дослық қатнасықлар стратегиялық шериклик дәрежесине шекем артқаны атап өтилди.

Еки мәмлекет халықларын бир-бирине байланыстырып туратуғын тарийхый, дәстүрий, мәдений қәдириятлардың уқсаслығы мәмлекетлераралық байланыслардың раўажланыўында үлкен әҳмийетке ийе екени атап өтилди.

Тәреплер экономикалық бирге ислесиўди кеңейтиў, аймақлараралық ҳәм мәмлекет исбилермен топарлары арасындағы саўда байланысларын буннан былай да раўажландырыў мәселелерине де айрықша итибар қаратты.

Сөйлесиў ўақтында 2026-жыл Өзбекстан ҳәм Венгрия арасындағы мәденият, илим ҳәм инновациялар жылы деп жәрияланғаны да атап өтилип, тәреплер еки мәмлекетте бир қатар ири илажларды өткериў мәселелери бойынша пикир алысты.

Парламентлераралық қатнасықларды избе-из раўажландырып барыў ҳәм мәмлекет басшылары дәрежесинде ерисилген келисимлерди әмелге асырыў, өз-ара бирге ислесиўди буннан былай да беккемлеў зәрүр екенлиги атап өтилди.

ӨзА