Өзбекстан Республикасы Президентиниң 2022-жыл 12-июльдеги қарары тийкарында халықаралық «Нөкис» автовокзалы жуўапкершилиги шекленген жәмийети имаратына 2025-жыл май айында реконструкциялаў жумыслары басланып, бүгинги күнде реконструкциялаў жумыслары «Арай сервис строй» ЖШЖ тәрепинен даўам еттирилмекте.

Бул жерде бир ўақыттың өзинде 250 жолаўшыға хызмет көрсетиў имканияты жаратылған. Жергиликли ҳәм халықаралық жөнелислерде автобуслардың қатнаўы жолға қойылған.

Вокзал ең алдынғы технологиялар менен үскенеленген, диспетчерлик хызмети, касса хызметкерлери, сондай-ақ, жолаўшылар ушын күтиў залларында заманагөй шараятлар жаратылған.

2000-жылы пайдаланыўға тапсырылған «Нөкис» автовокзалы ЖШЖ да күнделикли түрде ҳәр қыйлы жөнелислер бойынша, атап айтқанда, «Нөкис – Ташкент», «Нөкис – Алмата», «Нөкис – Үргениш», «Нөкис – Төрткүл», «Нөкис – Беруний», «Нөкис – Бостан» автобус ҳәм микроавтобуслар қалалараралық ҳәм халықаралық жөнелислерде хызмет көрсетпекте.

Автовокзалда өзине тийисли 4 дана «YUTONG» маркалы автобуслары бүгинги күнде «Ташкент – Нөкис» қалалараралық автобус жөнелисинде жолаўшыларға транспорт хызметин көрсетип келмекте.

Қарақалпақстан хабар агентлиги