Ózbekstan Respublikası Prezidentiniń 2022-jıl 12-iyuldegi qararı tiykarında xalıqaralıq «Nókis» avtovokzalı juwapkershiligi sheklengen jámiyeti imaratına 2025-jıl may ayında rekonstrukciyalaw jumısları baslanıp, búgingi kúnde rekonstrukciyalaw jumısları «Aray servis stroy» JShJ tárepinen dawam ettirilmekte.

Bul jerde bir waqıttıń ózinde 250 jolawshıǵa xızmet kórsetiw imkaniyatı jaratılǵan. Jergilikli hám xalıqaralıq jónelislerde avtobuslardıń qatnawı jolǵa qoyılǵan.
Vokzal eń aldınǵı texnologiyalar menen úskenelengen, dispetcherlik xızmeti, kassa xızmetkerleri, sonday-aq, jolawshılar ushın kútiw zallarında zamanagóy sharayatlar jaratılǵan.
2000-jılı paydalanıwǵa tapsırılǵan «Nókis» avtovokzalı JShJ da kúndelikli túrde hár qıylı jónelisler boyınsha, atap aytqanda, «Nókis – Tashkent», «Nókis – Almata», «Nókis – Úrgenish», «Nókis – Tórtkúl», «Nókis – Beruniy», «Nókis – Bostan» avtobus hám mikroavtobuslar qalalararalıq hám xalıqaralıq jónelislerde xızmet kórsetpekte.
Avtovokzalda ózine tiyisli 4 dana «YUTONG» markalı avtobusları búgingi kúnde «Tashkent – Nókis» qalalararalıq avtobus jónelisinde jolawshılarǵa transport xızmetin kórsetip kelmekte.

Qaraqalpaqstan xabar agentligi