Өзбекстан Республикасы Президенти Шавкат Мирзиёевтиң мирәт етиўине бола, Қазақстан Республикасы Президенти Қасым-Жомарт Тоқаев 14-ноябрь күни мәмлекетлик сапар менен Ташкентке келди. Қазақстан жетекшисин Президентимиз Шавкат Мирзиёев күтип алды.

Қасым-Жомарт Тоқаев мәмлекетимизге келгеннен соң, мәмлекет басшылары “Ташкент-Хумо” халықаралық аэропортында сәўбет өткерди.

Өзбекстан – Қазақстан стратегиялық шериклик ҳәм аўқамласлық қатнасықларын буннан былай да раўажландырыў мәселелери бойынша пикир алысылды.

Буннан соң Қазақстан Республикасы Президенти Қасым-Жомарт Тоқаевты рәсмий күтип алыў мәресими болып өтти.

Жоқары мәртебели мийман ҳүрметине еки мәмлекет байрақлары көтерилди, ҳүрметли қараўыл сап тартты. Әскерий оркестрдиң атқарыўында Өзбекстан ҳәм Қазақстан мәмлекетлик гимнлери жаңлады.

Президентлер Қасым-Жомарт Тоқаев ҳәм Шавкат Мирзиёев ҳүрметли қараўыл қатары алдынан өтип, рәсмий делегациялар ағзаларын қутлықлады.

Сапар бағдарламасына муўапық, 15-ноябрь күни, жоқары дәрежедеги сөйлесиўлер ҳәм Жоқары мәмлекетлераралық кеңестиң екинши мәжилиси болып өтеди.

Саммит шеңберинде ири биргеликтеги жойбарлар иске қосылыўы ҳәм еки тәреплеме ҳүжжетлердиң үлкен топламына қол қойылыўы күтилмекте.

ӨзА