Ózbekstan Respublikası Prezidenti Shavkat Mirziyoevtiń mirát etiwine bola, Qazaqstan Respublikası Prezidenti Qasım-Jomart Toqaev 14-noyabr kúni mámleketlik sapar menen Tashkentke keldi. Qazaqstan jetekshisin Prezidentimiz Shavkat Mirziyoev kútip aldı.

Qasım-Jomart Toqaev mámleketimizge kelgennen soń, mámleket basshıları “Tashkent-Xumo” xalıqaralıq aeroportında sáwbet ótkerdi.
Ózbekstan – Qazaqstan strategiyalıq sheriklik hám awqamlaslıq qatnasıqların bunnan bılay da rawajlandırıw máseleleri boyınsha pikir alısıldı.
Bunnan soń Qazaqstan Respublikası Prezidenti Qasım-Jomart Toqaevtı rásmiy kútip alıw máresimi bolıp ótti.
Joqarı mártebeli miyman húrmetine eki mámleket bayraqları kóterildi, húrmetli qarawıl sap tarttı. Áskeriy orkestrdiń atqarıwında Ózbekstan hám Qazaqstan mámleketlik gimnleri jańladı.
Prezidentler Qasım-Jomart Toqaev hám Shavkat Mirziyoev húrmetli qarawıl qatarı aldınan ótip, rásmiy delegaciyalar aǵzaların qutlıqladı.
Sapar baǵdarlamasına muwapıq, 15-noyabr kúni, joqarı dárejedegi sóylesiwler hám Joqarı mámleketleraralıq keńestiń ekinshi májilisi bolıp ótedi.
Sammit sheńberinde iri birgeliktegi joybarlar iske qosılıwı hám eki tárepleme hújjetlerdiń úlken toplamına qol qoyılıwı kútilmekte.

ÓzA