Ҳәзирги күнлери Саудия Арабстанының Ар-Рияд қаласында VI Ислам тилеклеслик ойынлары болып өтпекте.

Бул жарыста Өзбекстан спорт делегациясы қурамында спорттың бир неше түрлери бойынша республикамыз спортшылары да табыслы қатнаспақта. Атап айтқанда, бул абырайлы жарыста бокс бойынша -60 кг салмақта Өзбекстан сайланды командасы қурамында беллесиўлерге түскен үмитли спортшымыз Мадияр Данияров барлық қарсыласларын жеңип шығып, алтын медаль ийесине айланған ҳәм барлық спорт жанкүйерлерин шексиз қуўанышқа бөлеген еди.

Кеше жеңимпаз боксшимиз Мадияр Данияров республикамызға қайтып келди ҳәм Нөкис халықаралық аэропортында республикамыз кең жәмийетшилиги, тренер-устазлары, ата-аналары ҳәм ғалаба хабар қураллары ўәкиллери тәрепинен салтанатлы түрде күтип алынды.

Спортшыны күтип алыў мәресиминде Қарақалпақстан Республикасы Жоқарғы Кеңесиниң комитет баслығы Мурат Атамуратов, Спорт министри Еркинбай Қутыбаевлар шығып сөйлеп, боксшимизди ерискен үлкен табысы менен қутлықлады ҳәм Мадиярдың бул жеңиси республикамыздың бокс тарийхында зер ҳәриплер менен мөрленип қалатуғынынын атап өтти.

Илажда VI Ислам тилеклеслик ойынларының чемпионы Мадияр Данияров ҳәм оның тренери Шараф Айтбаевқа гүл дәстелери ҳәм естелик саўғалары тапсырылды.

– Мениң қуўанышыма шерик болып, салтанатлы түрде күтип алғаны ушын республикамыз ҳүкимети, тараў басшылары ҳәм бокс жанкүйерлерине үлкен рахмет айтаман. Алдағы ўақытлары халқымыздың исенимин толық ақлап, Азия ҳәм жәҳән чемпионатларында да алтын медальды қолға киргизиўге ҳәрекет етемен, – дейди қуўаныштан жүзлери гүл жайнаған Мадияр Данияров.

Адилбай Оразов,

Қарақалпақстан хабар агентлиги шолыўшысы