Házirgi kúnleri Saudiya Arabstanınıń Ar-Riyad qalasında VI Islam tilekleslik oyınları bolıp ótpekte.

Bul jarısta Ózbekstan sport delegaciyası quramında sporttıń bir neshe túrleri boyınsha respublikamız sportshıları da tabıslı qatnaspaqta. Atap aytqanda, bul abıraylı jarısta boks boyınsha -60 kg salmaqta Ózbekstan saylandı komandası quramında bellesiwlerge túsken úmitli sportshımız Madiyar Daniyarov barlıq qarsılasların jeńip shıǵıp, altın medal iyesine aylanǵan hám barlıq sport jankúyerlerin sheksiz quwanıshqa bólegen edi.
Keshe jeńimpaz boksshimiz Madiyar Daniyarov respublikamızǵa qaytıp keldi hám Nókis xalıqaralıq aeroportında respublikamız keń jámiyetshiligi, trener-ustazları, ata-anaları hám ǵalaba xabar quralları wákilleri tárepinen saltanatlı túrde kútip alındı.
Sportshını kútip alıw máresiminde Qaraqalpaqstan Respublikası Joqarǵı Keńesiniń komitet baslıǵı Murat Atamuratov, Sport ministri Erkinbay Qutıbaevlar shıǵıp sóylep, boksshimizdi erisken úlken tabısı menen qutlıqladı hám Madiyardıń bul jeńisi respublikamızdıń boks tariyxında zer háripler menen mórlenip qalatuǵınının atap ótti.
Ilajda VI Islam tilekleslik oyınlarınıń chempionı Madiyar Daniyarov hám onıń treneri Sharaf Aytbaevqa gúl dásteleri hám estelik sawǵaları tapsırıldı.
– Meniń quwanıshıma sherik bolıp, saltanatlı túrde kútip alǵanı ushın respublikamız húkimeti, taraw basshıları hám boks jankúyerlerine úlken raxmet aytaman. Aldaǵı waqıtları xalqımızdıń isenimin tolıq aqlap, Aziya hám jáhán chempionatlarında da altın medaldı qolǵa kirgiziwge háreket etemen, – deydi quwanıshtan júzleri gúl jaynaǵan Madiyar Daniyarov.

Adilbay Orazov,
Qaraqalpaqstan xabar agentligi sholıwshısı.