Ҳәзирги ўақытта Тақыятас районында тутыныўшыларға үзиликсиз тәбийғый газ жеткерип бериў, хызмет көрсетиўдиң сапасын жақсылаў бағдарында кең көлемли илажлар алып барылмақта.

Тақыятас районлық газ тәмийнаты бөлими тәрепинен 2025-2026-жылғы гүзги-қысқы мәўсим ушын газ тармақларын реконструкциялаў режесиндеги 9,9 километр газ қубырларын оңлаў, жағдайын жақсылаў, хызмет мүддетин узайтыў бойынша анық жумыслар әмелге асырылмақта.

Гүзги-қысқы мәўсимге таярлық шеңбериндеги жумысларды үйрениў даўамында анықланған кемшилик ҳәм насаз жағдайлар тезлик пенен сапластырылмақта. Атап айтқанда, райондағы «Кенегес» аўыл пуқаралар жыйынындағы жер асты жоқары басымлы тармақтың 1 километр 500 метр, «Абат мәкан» мәкан пуқаралар жыйыны аймағындағы жер асты орта басымлы тармақтың 1 километр 800 метр бөлеги жер үстине шығарылып, «Қусшылық» мәкан пуқаралар жыйыны аймағындағы тармақтың 2 километр 500 метр бөлегин реконструкциялаў жумыслары алып барылды.

– Тийкарғы мақсетимиз пайдаланыў мүддети 30-40 жылдан асқан газ тармақларымызды оңлап, автоматластырылған газ бөлистириў станциялары қабыл етип алған газлерди тутыныўшыларға ысырапсыз жеткерип бериў, – дейди «Ҳудудгаз Қорақалпоғистон» филиалы жетекши қәнигеси Руслан Ғаррыбаев.

Сондай-ақ, бүгинги күнге шекем районның «Нурлы келешек» МПЖ ҳәм «Найманкөл» АПЖ ға тартылған жер асты орта басымлы газ тармағының 2 километр 500 метр бөлеги жер үстине шығарылып, реконструкцияланды. Нәтийжеде 8 мың 572 хожалықтағы тәбийғый газ тәмийнаты және де жақсыланыўына ерисилди.

– Районымызда халықты газ бенен үзиликсиз тәмийинлеў бағдарында үлкен жумыслар әмелге асырылмақта, – дейди мийнет нураныйы Жолдасбай Алламбергенов. –  Әмелге асырылған илажлар себепли үйлеримиз ыссы, кеўлимиз қәтержам болмақта.

Қарақалпақстан хабар агентлиги