Házirgi waqıtta Taqıyatas rayonında tutınıwshılarǵa úziliksiz tábiyǵıy gaz jetkerip beriw, xızmet kórsetiwdiń sapasın jaqsılaw baǵdarında keń kólemli ilajlar alıp barılmaqta.

Taqıyatas rayonlıq gaz támiynatı bólimi tárepinen 2025-2026-jılǵı gúzgi-qısqı máwsim ushın gaz tarmaqların rekonstrukciyalaw rejesindegi 9,9 kilometr gaz qubırların ońlaw, jaǵdayın jaqsılaw, xızmet múddetin uzaytıw boyınsha anıq jumıslar ámelge asırılmaqta.
Gúzgi-qısqı máwsimge tayarlıq sheńberindegi jumıslardı úyreniw dawamında anıqlanǵan kemshilik hám nasaz jaǵdaylar tezlik penen saplastırılmaqta. Atap aytqanda, rayondaǵı «Keneges» awıl puqaralar jıyınındaǵı jer astı joqarı basımlı tarmaqtıń 1 kilometr 500 metr, «Abat mákan» mákan puqaralar jıyını aymaǵındaǵı jer astı orta basımlı tarmaqtıń 1 kilometr 800 metr bólegi jer ústine shıǵarılıp, «Qusshılıq» mákan puqaralar jıyını aymaǵındaǵı tarmaqtıń 2 kilometr 500 metr bólegin rekonstrukciyalaw jumısları alıp barıldı.
– Tiykarǵı maqsetimiz paydalanıw múddeti 30-40 jıldan asqan gaz tarmaqlarımızdı ońlap, avtomatlastırılǵan gaz bólistiriw stanciyaları qabıl etip alǵan gazlerdi tutınıwshılarǵa ısırapsız jetkerip beriw, – deydi «Hududgaz Qoraqalpoǵiston» filialı jetekshi qánigesi Ruslan Ǵarrıbaev.
Sonday-aq, búgingi kúnge shekem rayonnıń «Nurlı keleshek» MPJ hám «Naymankól» APJ ǵa tartılǵan jer astı orta basımlı gaz tarmaǵınıń 2 kilometr 500 metr bólegi jer ústine shıǵarılıp, rekonstrukciyalandı. Nátiyjede 8 mıń 572 xojalıqtaǵı tábiyǵıy gaz támiynatı jáne de jaqsılanıwına erisildi.
– Rayonımızda xalıqtı gaz benen úziliksiz támiyinlew baǵdarında úlken jumıslar ámelge asırılmaqta, – deydi miynet nuranıyı Joldasbay Allambergenov. – Ámelge asırılǵan ilajlar sebepli úylerimiz ıssı, kewlimiz qáterjam bolmaqta.

Qaraqalpaqstan xabar agentligi.