Өзбекстан Республикасы Президенти Шавкат Мирзиёевтиң мирәт етиўине бола Сербия Республикасы Президенти Александр Вучич рәсмий сапар менен мәмлекетимизде болып тур. Жоқары мәртебели мийман өмирлик жолдасы менен 29-октябрь күни Ташкент қаласында қурылған Ислам цивилизациясы орайына барды. Сапар етиў даўамында Сербия Президентиниң Ислам архитектурасының ҳақыйқый дүрданалары ҳәм Өзбекстанның Үшинши ояныў дәўириниң тымсалы есапланған комплекстен алған тәсирлери менен қызықсындық.

– Ислам цивилизациясы орайында бүгин бақлаўшы ҳәм үйрениўши мийманлар көп болды, ол жердеги бийбаҳа естеликлердиң ашық көрсетилип атырғаны ушын мен Президентиңизге миннетдаршылық билдиремен, – деп пикир билдиреди Президент Александр Вучич. – Бул тек ғана сырт елли мийманлар ушын емес, ал мәмлекетиңиз жаслары ушын да оғада үлкен әҳмийетке ийе комплекс. Себеби олар орайда мәмлекетиңиздиң тарийхы менен бирге, Ислам тарийхын да терең үйренеди. Бул жерде мен бүгин жүдә көп нәрсени үйрендим ҳәм, әлбетте, және қайтаман. Бул жердиң қурылыўы, шөлкемлестирилиўи ҳәм адамларға қандай усынылып атырғанына гүўа болдым. Ҳақыйқатында да, ҳәммеси оғада заманагөй ҳәм әжайып усылда исленген, мен буған уқсасын алдын көрмегенмен.

– Уллы мәртебели мырза Александр Вучич, Сиз сапар етиўиңиз шеңберинде Өзбекстан Республикасы Президенти Шавкат Мирзиёев пенен ушырастыңыз. Бул ушырасыў ўақтында қандай басламаларды алға қойдыңыз? Нәтийжелерден қанаатландыңыз ба?

– Ҳәзирги ўақытқа шекем ерискен нәтийжелеримизден оғада қуўанышлыман. Кеше келешектеги бирге ислесиўимиз бойынша биргеликтеги декларация, сондай-ақ, бир неше ҳүжжетлерге қол қойылды. Өзбекстан аймағында өткерилетуғын ҳүкиметлераралық комиссиядан соң мүмкин болғанынша тезирек Президент Шавкат Мирзиёевти Белградда күтип алыўға миясар боламыз, деп үмит етемен. Бул бизиң түрли тараўлардағы бирге ислесиўимизди буннан былай да раўажландырыўға хызмет етеди.

– Сиз алдын журналист сыпатында да жумыс ислегенсиз, бул қысқа дәўир болған, биз оған үлкен ҳүрмет пенен қараймыз. Сиз бенен сәўбетлесиў – биз ушын мақтаныш, кәсиплесимиз де есапланасыз. Егер Өзбекстанға журналист сыпатында сапар етип келсеңиз, өз репортажыңызды неден баслаған болар едиңиз?

– Мен барлық ўатанласларыма былай дейтуғын едим: “Әзизлерим, мен оғада қәтелестим, себеби бул мәмлекетке алдын ҳеш қашан келмегенмен. Илтимас, имканы барынша тезирек Өзбекстанды көриў ушын келиң”.

– Шын жүректен сәўбет ушын рахмет! 

ӨзА