Ózbekstan Respublikası Prezidenti Shavkat Mirziyoevtiń mirát etiwine bola Serbiya Respublikası Prezidenti Aleksandr Vuchich rásmiy sapar menen mámleketimizde bolıp tur. Joqarı mártebeli miyman ómirlik joldası menen 29-oktyabr kúni Tashkent qalasında qurılǵan Islam civilizaciyası orayına bardı. Sapar etiw dawamında Serbiya Prezidentiniń Islam arxitekturasınıń haqıyqıy dúrdanaları hám Ózbekstannıń Úshinshi oyanıw dáwiriniń tımsalı esaplanǵan kompleksten alǵan tásirleri menen qızıqsındıq.
– Islam civilizaciyası orayında búgin baqlawshı hám úyreniwshi miymanlar kóp boldı, ol jerdegi biybaha esteliklerdiń ashıq kórsetilip atırǵanı ushın men Prezidentińizge minnetdarshılıq bildiremen, – dep pikir bildiredi Prezident Aleksandr Vuchich. – Bul tek ǵana sırt elli miymanlar ushın emes, al mámleketińiz jasları ushın da oǵada úlken áhmiyetke iye kompleks. Sebebi olar orayda mámleketińizdiń tariyxı menen birge, Islam tariyxın da tereń úyrenedi. Bul jerde men búgin júdá kóp nárseni úyrendim hám, álbette, jáne qaytaman. Bul jerdiń qurılıwı, shólkemlestiriliwi hám adamlarǵa qanday usınılıp atırǵanına gúwa boldım. Haqıyqatında da, hámmesi oǵada zamanagóy hám ájayıp usılda islengen, men buǵan uqsasın aldın kórmegenmen.
– Ullı mártebeli mırza Aleksandr Vuchich, Siz sapar etiwińiz sheńberinde Ózbekstan Respublikası Prezidenti Shavkat Mirziyoev penen ushırastıńız. Bul ushırasıw waqtında qanday baslamalardı alǵa qoydıńız? Nátiyjelerden qanaatlandıńız ba?
– Házirgi waqıtqa shekem erisken nátiyjelerimizden oǵada quwanıshlıman. Keshe keleshektegi birge islesiwimiz boyınsha birgeliktegi deklaraciya, sonday-aq, bir neshe hújjetlerge qol qoyıldı. Ózbekstan aymaǵında ótkeriletuǵın húkimetleraralıq komissiyadan soń múmkin bolǵanınsha tezirek Prezident Shavkat Mirziyoevti Belgradda kútip alıwǵa miyasar bolamız, dep úmit etemen. Bul biziń túrli tarawlardaǵı birge islesiwimizdi bunnan bılay da rawajlandırıwǵa xızmet etedi.
– Siz aldın jurnalist sıpatında da jumıs islegensiz, bul qısqa dáwir bolǵan, biz oǵan úlken húrmet penen qaraymız. Siz benen sáwbetlesiw – biz ushın maqtanısh, kásiplesimiz de esaplanasız. Eger Ózbekstanǵa jurnalist sıpatında sapar etip kelseńiz, óz reportajıńızdı neden baslaǵan bolar edińiz?
– Men barlıq watanlaslarıma bılay deytuǵın edim: “Ázizlerim, men oǵada qátelestim, sebebi bul mámleketke aldın hesh qashan kelmegenmen. Iltimas, imkanı barınsha tezirek Ózbekstandı kóriw ushın keliń”.
– Shın júrekten sáwbet ushın raxmet!

ÓzA