Прагада “Highlights of theSilk Road” кең көлемли жойбары шеңберинде Өзбекстан ҳәм Әзербайжан биргеликтеги саяхат жол-шоусы болып өтти. Илаж алты қала – Франкфурт, Вена, Цюрих, Будапешт, Прага ҳәм Барселонани қамтып алыўшы Европа бойлап саяхаттың бир бөлегине айланды.

Бул баслама Әзербайжан Туризм бюросы (АТБ) ҳәм Өзбекстан Миллий PR-орайы менен биргеликте әмелге асырылды. Оннан гөзленген тийкарғы мақсет – еки мәмлекеттиң мәдений, тарийхый ҳәм тәбийғый туризм потенциалын кеңнен үгит-нәсиятлаў, Уллы Жипек жолы бойлап биргеликтеги жөнелислерди раўажландырыў ҳәм туроператорлар арасында профессионал байланысларды беккемлеўден ибарат.

Мәжилисте Туризм комитетлери, PR-орайлар ҳәм мийманханалар тармағының ўәкиллери, сондай-ақ, чехиялы туроператорлар ҳәм тийисли шөлкемлердиң басшылары қатнасты.

Презентацияда Өзбекстан тәрепи ЮНЕСКО Дүнья жүзилик мийрасының дизимине киргизилген мәмлекеттиң тийкарғы туристлик бағдарлары – Самарқанд, Бухара ҳәм Хийўа қалалары менен таныстырды. Экологиялық, гастрономиялық, таў-кән ҳәм мәдений туризмди раўажландырыўға айрықша итибар қаратылды.

Рәсмий бөлимнен соң B2B форматындағы сессиялар даўам етти. Оның шеңберинде Өзбекстан, Әзербайжан ҳәм Чехиялы туроператорлар бирге ислесиў перспективаларын додалады ҳәм биргеликтеги туризм өнимлерин қәлиплестириў бойынша усыныслар алмасты.

Итибарлы тәрепи, қатнасыўшылар тәрепинен елимиз бүгинги күнде бай тарийх, заманагөй инфраструктура ҳәм жоқары сапалы туризм хызметлери менен үйлескен қәўипсиз ҳәм миймандос жөнелис сыпатында тән алынды.

Азиза Алимова, ӨзА