Pragada “Highlights of theSilk Road” keń kólemli joybarı sheńberinde Ózbekstan hám Ázerbayjan birgeliktegi sayaxat jol-shousı bolıp ótti. Ilaj altı qala – Frankfurt, Vena, Cyurix, Budapesht, Praga hám Barselonani qamtıp alıwshı Evropa boylap sayaxattıń bir bólegine aylandı.

Bul baslama Ázerbayjan Turizm byurosı (ATB) hám Ózbekstan Milliy PR-orayı menen birgelikte ámelge asırıldı. Onnan gózlengen tiykarǵı maqset – eki mámlekettiń mádeniy, tariyxıy hám tábiyǵıy turizm potencialın keńnen úgit-násiyatlaw, Ullı Jipek jolı boylap birgeliktegi jónelislerdi rawajlandırıw hám turoperatorlar arasında professional baylanıslardı bekkemlewden ibarat.
Májiliste Turizm komitetleri, PR-oraylar hám miymanxanalar tarmaǵınıń wákilleri, sonday-aq, chexiyalı turoperatorlar hám tiyisli shólkemlerdiń basshıları qatnastı.
Prezentaciyada Ózbekstan tárepi YuNESKO Dúnya júzilik miyrasınıń dizimine kirgizilgen mámlekettiń tiykarǵı turistlik baǵdarları – Samarqand, Buxara hám Xiywa qalaları menen tanıstırdı. Ekologiyalıq, gastronomiyalıq, taw-kán hám mádeniy turizmdi rawajlandırıwǵa ayrıqsha itibar qaratıldı.
Rásmiy bólimnen soń B2B formatındaǵı sessiyalar dawam etti. Onıń sheńberinde Ózbekstan, Ázerbayjan hám CHexiyalı turoperatorlar birge islesiw perspektivaların dodaladı hám birgeliktegi turizm ónimlerin qáliplestiriw boyınsha usınıslar almastı.
Itibarlı tárepi, qatnasıwshılar tárepinen elimiz búgingi kúnde bay tariyx, zamanagóy infrastruktura hám joqarı sapalı turizm xızmetleri menen úylesken qáwipsiz hám miymandos jónelis sıpatında tán alındı.

Aziza Alimova, ÓzA