Санкт-Петербург қаласында БРИКС, ҒМДА, ШБШ және Жақын Шығыс ҳәм Арқа Африка регионларының 30 дан аслам мәмлекетинен 2000 ға шамалас қатнасыўшыны бирлестирген Креатив экономика бойынша халықаралық конференция болып өтти. Әнжуман бағдарламасына санаат тармағының жәҳән экономикасы ҳәм халықаралық бирге ислесиўдеги орнына бағышланған 50 ден аслам илаж киргизилди.

“Россия креатив экономикасы” темасындағы жалпы мәжилисте РФ ҳүкимети баслығының орынбасары Александр Новак ҳәм Стратегиялық басламалар агентлигиниң бас директоры Светлана Чупшева менен бирге Өзбекстан Мәденият ҳәм көркем өнерди раўажландырыў қорының баслығы, Президент Администрациясы Креатив экономика ҳәм туризм департаментиниң басшысы Гаянэ Умерова да шығып сөйледи. Ол өз мүрәжатында креатив экономика мәмлекетимиз ушын стратегиялық әҳмийетке ийе екенин атап өтип, бул тараў кең көлемли мәдений басламаларды әмелге асырыў ҳәм сырт ел бирге ислесиўин раўажландырыўға да салмақлы үлес қосып атырғанына итибар қаратты.

Илаж қатнасыўшыларының атап өтиўинше, мәмлекетимиздиң конференциядағы қатнасыўы дүнья күн тәртибин қәлиплестириўдеги белсендилигин және бир мәрте тастыйықлайды. Қалаберди, дөретиўшилик турақлы раўажланыў ҳәм мәдений қарым-қатнас дереги сыпатында шексиз әҳмийетке ийе.

Әнжуман шеңберинде Өзбекстан Мәденият ҳәм көркем өнерди раўажландырыў қоры ҳәм РФ Стратегиялық басламалар агентлиги арасында бирге ислесиў ҳаққындағы протоколға қол қойылды. Бул келисим Россияның 67 аймағында әллеқашан қолланылып атырған тәртипке салыўға байланыслы ең жақсы әмелият, методикалық тийкар ҳәм аналитикалық қуралларды жәмлеген Креатив санаатты раўажландырыў регионаллық стандартын республикамызға бейимлестириў ҳәм енгизиўди нәзерде тутады.

Буннан тысқары, келисим еки мәмлекет арасында креатив экономика тараўындағы шерикликти беккемлеў жолындағы әҳмийетли қәдем сыпатында тәжирийбе алмасыў, биргеликте изертлеў өткериў ҳәм креатив санаат тармағын раўажландырыў стратегиясын ислеп шығыў ушын кең имканият ашады.

Беҳруз Худойбердиев, ӨзА