Sankt-Peterburg qalasında BRIKS, ǴMDA, ShBSh jáne Jaqın Shıǵıs hám Arqa Afrika regionlarınıń 30 dan aslam mámleketinen 2000 ǵa shamalas qatnasıwshını birlestirgen Kreativ ekonomika boyınsha xalıqaralıq konferenciya bolıp ótti. Ánjuman baǵdarlamasına sanaat tarmaǵınıń jáhán ekonomikası hám xalıqaralıq birge islesiwdegi ornına baǵıshlanǵan 50 den aslam ilaj kirgizildi.

“Rossiya kreativ ekonomikası” temasındaǵı jalpı májiliste RF húkimeti baslıǵınıń orınbasarı Aleksandr Novak hám Strategiyalıq baslamalar agentliginiń bas direktorı Svetlana CHupsheva menen birge Ózbekstan Mádeniyat hám kórkem ónerdi rawajlandırıw qorınıń baslıǵı, Prezident Administraciyası Kreativ ekonomika hám turizm departamentiniń basshısı Gayane Umerova da shıǵıp sóyledi. Ol óz múrájatında kreativ ekonomika mámleketimiz ushın strategiyalıq áhmiyetke iye ekenin atap ótip, bul taraw keń kólemli mádeniy baslamalardı ámelge asırıw hám sırt el birge islesiwin rawajlandırıwǵa da salmaqlı úles qosıp atırǵanına itibar qarattı.
Ilaj qatnasıwshılarınıń atap ótiwinshe, mámleketimizdiń konferenciyadaǵı qatnasıwı dúnya kún tártibin qáliplestiriwdegi belsendiligin jáne bir márte tastıyıqlaydı. Qalaberdi, dóretiwshilik turaqlı rawajlanıw hám mádeniy qarım-qatnas deregi sıpatında sheksiz áhmiyetke iye.
Ánjuman sheńberinde Ózbekstan Mádeniyat hám kórkem ónerdi rawajlandırıw qorı hám RF Strategiyalıq baslamalar agentligi arasında birge islesiw haqqındaǵı protokolǵa qol qoyıldı. Bul kelisim Rossiyanıń 67 aymaǵında álleqashan qollanılıp atırǵan tártipke salıwǵa baylanıslı eń jaqsı ámeliyat, metodikalıq tiykar hám analitikalıq qurallardı jámlegen Kreativ sanaattı rawajlandırıw regionallıq standartın respublikamızǵa beyimlestiriw hám engiziwdi názerde tutadı.
Bunnan tısqarı, kelisim eki mámleket arasında kreativ ekonomika tarawındaǵı sheriklikti bekkemlew jolındaǵı áhmiyetli qádem sıpatında tájiriybe almasıw, birgelikte izertlew ótkeriw hám kreativ sanaat tarmaǵın rawajlandırıw strategiyasın islep shıǵıw ushın keń imkaniyat ashadı.

Behruz Xudoyberdiev, ÓzA