Өзбекстан мәмлекетлик консерваториясы Нөкис филиалының студентлери Диёрбек Еримбетов, Илҳом Туримбетов, Жасурбек Пирназаров ҳәм Асқар Абдисултановлар Қытай Халық Республикасындағы Ухан музыка консерваториясында 4 ай даўамында билим алады.

Филиал ҳәм Қытай Халық Республикасындағы Ухан музыка консерваториясы арасында 2025-жыл 10-май күни өз-ара бирге ислесиў бойынша меморандум дүзилген еди. Усы меморандум шеңберинде жақында филиал директоры Р.Алланбаев, “Улыўма кәсиплик ҳәм социаллық-гуманитарлық пәнлер” кафедрасы доценти ўазыйпасын атқарыўшы Ж.Чаршемов ҳәм студент-жаслар Қытай Халық Республикасында болып қайтты. 4 айлық оқыў процеси де усы меморандумға бола, әмелге асырылады.

Буннан гөзленген мақсет – еки жоқары оқыў орны арасындағы қатнасықларды беккемлеў, студентлердиң теориялық ҳәм әмелий билимлерин және де жетилистириў, өз-ара тәжирийбе алмасыўдан ибарат.

Қарақалпақстан хабар агентлиги